Milliarderlar oilasida tug‘ilgan ikki yosh — Anant Ambani va Radhika Merchant 12-iyul kuni Mumbayda turmush qurishdi. Ambanilar oilasi bir necha oy davomida yirik tadbirlar uyushtirdi va unga jahonga mashhur ko‘plab insonlar tashrif buyurdi.
Keling, to‘yning diqqat markazi bo‘lgan kelinchak — Radhikaning to‘yoldi va keyingi marosimlardagi go‘zal liboslarini yaqindan tomosha qilamiz.
Shubh Aashirvade marosimida birinchi obraz
Ambani oilasi a’zosi sifatida birinchi chiqishi uchun kelin obrazi haqiqiy san’at asari edi. Uzoq vaqt davomida yaratilgan ushbu go‘zallik hindistonlik dizayner Reya Kapur hamda rassom va haykaltarosh Jayasri Birman bilan hamkorlikda tikilgan.
Jayasrining suratlarini libosga jo etish uchun 12 ta lehenga paneli maxsus italyan matosida chizilgan. Undagi go‘zal tasvirlar qo‘l mehnati mahsuli bo‘lib, Zardozi brendiga mansub tilla kashtadan foydalanilgan.
Radhika Merchantning to‘y kunidagi obrazi
Ertaknamo uslubda o‘tgan ushbu to‘yda Radhika Abu Jani Sandeep Xosla brendiga tegishli va Radhika uchun maxsus buyurtma qilingan libosda namoyon bo‘ldi. Kelinchak an’anaga ko‘ra yaqin qarindoshlari — onasi, xolalari va singlisi o‘z to‘ylarida avval taqib yurgan oilaviy zargarlik buyumlari bilan bezandi.
Radhika hindiston an’anasiga ko‘ra qizil va oq rangdagi kelin libosida bo‘ldi, bu gujarot xalqiga xos odatdir. Libos ikkita alohida olinadigan fata va 5 metrlik shleyfdan iborat bo‘lib, qimmatbaho toshlar va bezaklar bilan to‘ldirilgan.
Haldi marosimi uchun obraz
Haldi marosimida bo‘lajak kelin Radhika bir emas, ikkita bir-biridan go‘zal liboslarda paydo bo‘ldi.
Kelinning birinchi obrazi Anamika Khanna brendiga mansub sariq rangli lehenga ko‘ylagi bo‘ldi. Uning bo‘ynidagi gulli dupatta bezagi barchaning e’tiborini tortdi. Ushbu obraz uchun Radhika yengil va sokin makiyaj tanladi.
Haldi marosimidan keyingi kechada Radhika Anamika Khanna brendining yana bir ko‘rkam libosida chiqish qildi.
Bu safar u murakkab kashta hamda olmos toshlar bilan ishlov berilgan lehengani tanladi.
Sangit marosimi uchun obraz
Ushbu obrazda kelinchak butunlay boshqacha qiyofada paydo bo‘ldi. Xabarlarga ko‘ra, bu obraz ziyofatning yakuniy qismi uchun mo‘ljallangan.
Radhika dizayner Manish Malhotra tomonidan yaratilgan kulrang va zanjirsimon sari kiydi. Sari zamonaviy uslubda ishlangan bo‘lib, uning ustki qismi korsetdan iborat. Kelinning ushbu yorqin obrazi olmos taqinchoqlari, choker marjonlari, qimmatbaho zirak va bilaguzuklar bilan yakunlangan.
Radhikaning Sangit marosimi uchun kunduzgi ko‘rinishi ham o‘zgacha betakror va hind milliy uslubida bo‘ldi.
“Dandiya” uchun oqshom libosi
4-iyul, payshanba kuni Kokilaben Ambani (Anantning buvisi) bo‘lajak juftlik uchun dabdabali “Dandiya” ziyofatini uyushtirdi. Unda Radhika yorqin siyohrang hindcha milliy libosda namoyon bo‘ldi.
Mameru marosimi uchun obraz
3-iyul, chorshanba kuni Antillada bo‘lib o‘tgan Mameru marosimida kelinchakka oila a’zolari tomonidan turli sovg‘alar, zargarlik buyumlari taqdim etildi. Kechada Radhika dizayner Manish Malhotra tomonidan tayyorlangan lehengada to‘y marosimidan zavqlandi.
Izoh (0)