Andijon viloyati Asaka tumanida Nexia-2 haydovchisi YPX xodimlaridan qochib, 2 ta mashina bilan to‘qnashdi. Bu haqda YHXB xabar berdi.
Unga ko‘ra, holat 26-may kuni soat 14:00 larda Andijon tumani Yangi Asaka yo‘li hududida sodir bo‘lgan. Hududda xizmat olib borayotgan YPX inspektori tomonidan Nexia-2 ga hujjatlarini tekshirish maqsadida to‘xtash ishorasi berilgan.
Haydovchi — 2005-yilda tug‘ilgan A.M. inspektorning qonuniy talabiga bo‘ysunmasdan Asaka tumani hududi tomon ketib yuborgan. Shuningdek, “Ko‘rkam” MFY hududida xizmat olib borayotgan bir nechta JTSB hamda YPX inspektorlarining qonuniy talablariga bo‘ysunmasdan harakatlanib ketayotgan vaqtida, ichki ko‘chadan asosiy yo‘lga keskin chiqib yuborishi oqibatida o‘z yo‘nalishida harakatlanib kelayotgan Labo va Captiva bilan to‘qnashgan.
Shundan so‘ng voqea joyidan qochib ketgan. Xodimlar ushbu transport vositasini kuzatib borib, Asaka tumani “Humo” MFY hududida to‘sib ushlagan. Ushbu transport vositasi hamda haydovchining yoni ikki nafar xolislar ishtirokida ko‘zdan kechirilganida, ushbu transport vositasining salonida o‘tkir tig‘li jism (pichoq) borligi hamda haydovchi tegishli hujjatlarsiz transport vositasini boshqargani aniqlangan.
Sodir etilgan yo‘l-transport hodisasida tan jarohati olgan fuqarolar yo‘q, transport vositalari texnik shikastlangan. Holat yuzasidan Asaka tumani IIB masʼul xodimlari tomonidan haydovchiga nisbatan Maʼmuriy javobgarlik to‘g‘risidagi kodeksning 288-moddasi tartibida tuman IIBning vaqtinchalik ushlab turish hibsxonasiga joylashtirilib, hozirda dastlabki surishtiruv harakatlari olib borilmoqda.
Bundan avval Buxoro viloyatining Jondor tumanida haydovchi Cobalt’ni qasddan YPX xodimi ustiga haydagani haqida xabar berilgan edi. 19-yanvar kuni Navoiyda 16 yoshli bola otasining mashinasida YPX xodimini urib yuborib, uning o‘limiga sababchi bo‘lgandi.
Surxondaryoda YPX xodimi qochishga uringan haydovchiga elektroshoker qo‘llagan edi. Surxondaryoda voyaga yetmagan bola YPX xodimini sudrab, Cobalt olib qochgan edi.
Izoh (0)