Qoraqalpog‘istonda yo‘l-patrul xodimi avtomobilni yuqori tezlikda, telefondan foydalangan holda boshqargan 20 yashar yigitni ortidan quvib qo‘lga oldi. Qo‘lga olinish jarayonini montaj qilib, internetda tarqatgan shaxslar bo‘yicha surishtiruv boshlandi. Bu haqda YHXX axborot xizmati rahbari Zoyir Yo‘ldoshev xabar berdi.
Hodisa 24-may kuni Qong‘irot tumanidagi maktab yaqinida sodir bo‘lgan. Inspektor Damas avtomobilini yuqori tezlikda va telefondan foydalanib boshqargan yigitni to‘xtatgan. U maktab o‘quvchisi emasligi maʼlum qilingan. Haydovchidan tegishli hujjatlar so‘ralganida, 20 yoshli yigit hujjatlarini taqdim eta olmagan. U akasiga tegishli avtomashinani boshqargani aniqlangan.
46 yoshli YPX xodimi qoidabuzar yigitning ortidan quvib, 30 soniyada qo‘lga olgan. Holat yuzasidan avtomobil jarima maydoniga qo‘yilgan. Haydovchi va unga avtomobilini bergan akasiga esa maʼmuriy bayonnoma rasmiylashtirilgan.
Shuningdek, inspektorning haydovchini qo‘lga olish jarayonini montaj qilib, ijtimoiy tarmoqlarda tarqatgan shaxslarga nisbatan surishtiruv ishlari olib borilmoqda. Ular BHMning 50 baravarigacha jarimaga tortilishi yoki 10 sutkagacha ma’muriy qamoq jazosi bilan jazolanishi mumkin.
Izoh (0)