Ijtimoiy tarmoqlarda Toshkent viloyatining Angren shahrida haydovchi va YPX xodimi o‘rtasida janjal sodir bo‘lgani tasvirlangan video tarqaldi. IIV YHXX holatga munosabat bildirib, hozirda shahar prokuraturasi tomonidan surishtiruv ishlari olib borilayotganini ma’lum qildi.
Ma’lum qilinishicha, 23-aprel kuni soat 09:40 larda Angren shahri Amir Temur ko‘chasida xizmat olib borgan YPX xodimi X.Rahmonov tomonidan me’yoriy hujjatlarini tekshirish maqsadida Matiz rusumli avtomobil haydovchisi to‘xtatilgan. Tekshiruv davomida haydovchida haydovchilik guvohnomasi va ushbu avtomobildan foydalanish uchun ishonchnoma yo‘qligi ma’lum bo‘lgan. Qoidabuzarlik holati YPX xodimi tomonidan tegishli tartibda rasmiylashtirilayotgan vaqtda 24 yoshli haydovchi S.N. unga nisbatan qonuniy chora ko‘rilishini payqagach, xodimga qarshilik ko‘rsata boshlagan.
YPX xodimi yaqin atrofda bo‘lgan hamkasblaridan amaliy yordam so‘ragan. Voqea joyiga o‘zini haydovchining akasi Sardor deya tanishtirgan fuqaro ham yetib kelib, xodimlarga faol qarshilik ko‘rsatib, ziddiyatli vaziyatni yuzaga keltirgan.
YPX xodimi tomonidan holat bo‘yicha Ma’muriy javobgarlik to‘g‘risidagi kodeksning 135-, 194- hamda 195-moddalari tartibida bayonnoma rasmiylashtirilgan va ushbu fuqarolar Angren shahar IIBga topshirilgan.
Matiz rusumli avtomobil vaqtincha saqlash uchun jarima maydoniga qo‘yilgan. Shuningdek, hozirda ushbu holat bo‘yicha Angren shahar prokuraturasi xodimlari tomonidan surishtiruv olib borilmoqda.
Avvalroq Farg‘onada mast haydovchi IIB xodimlarini haqorat qilib, tan jarohat yetkazgani, Samarqandda YPX inspektoriga qo‘l ko‘targan shaxsga nisbatan jinoyat ishi qo‘zg‘atilib, qamoqqa olingani, Namanganda YPX xodimi va niqobli shaxs fuqarolarga elektroshoker ishlatgani to‘g‘risida xabar berilgandi.
Izoh (0)