Qashqadaryo viloyatida qoidabuzar Damas haydovchisi YPX xodimining qonuniy talablariga bo‘ysunmay, unga qarshilik ko‘rsatdi. Bu haqda “Hudud” informatsion dasturida ma’lum qilindi.
Qayd etilishicha, Damas haydovchisi harakatlanish vaqtida mobil telefondan foydalangani uchun YPX xodimi tomonidan to‘xtatilgan. U sodir etgan qoidabuzarligini tushuntirgan xodimni haqorat qilib, xizmat faoliyatga qarshilik ko‘rsatgan. Shundan so‘ng haydovchi voqea joyidan mashinasini tashlab, qochib ketgan.
Oradan ma’lum vaqt o‘tgach, haydovchi va uning tanishlari YPX xodimining oldiga kelib, qarshilik ko‘rsatgan. Inspektor holat yuzasidan haydovchiga nisbatan tegishli bayonnoma rasmiylashtirib, avtomashinani jarima maydoniga joylashtirgan.
Ma’muriy javobgarlik to‘g‘risidagi kodeksning 194-moddasiga (Ichki ishlar organlari xodimining qonuniy talablarini bajarmaslik) ko‘ra bilan haydovchiga BHMning bir baravari miqdorida jarima hamda 34-moddasiga (Bir necha huquqbuzarlikni sodir etganlik uchun ma’muriy jazo qo‘llanish) asosan 15 sutka ma’muriy qamoq jazosi tayinlandi.
May boshida Toshkentda YPX xodimlarining talabini bajarmasdan, ularni haqorat qilgan shaxslar 15 sutkaga qamalgani to‘g‘risida xabar berilgandi. Aprel oxirida esa Qashqadaryo viloyati Shahrisabz shahrida YPX xodimi va haydovchi o‘rtasida janjal sodir bo‘lgan edi.
Izoh (0)