Toshkent viloyatining Bo‘stonliq tumanida o‘tkazilgan reyd davomida “Oqsoq ota” soyi qirg‘og‘ida MAN yuk mashinasi egalari ekskavator yordamida qum-shag‘al aralashmasini maxsus ruxsatnomasiz qazib olayotgani aniqlandi. Bu haqda Ekologiya vazirligi xabar berdi.
Natijada qonunlar talablari buzilgan hamda tabiatga 4 mlrd 504 mln 378 ming 636 so‘m miqdorida zarar yetkazilgan.
Holat yuzasidan Bo‘stonliq tuman IIB YPX xodimi yordamida 1 dona yuk mashinasi vaqtinchalik saqlab turish uchun jarima maydonchasiga joylashtirildi.
To‘plangan hujjatlar esa Bo‘stonliq tuman prokuraturasiga yuborildi.
Daryolar o‘zanlaridagi noruda materiallarni qazib olishga muddatsiz moratoriy joriy etilgan
Prezident farmoni bilan Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanlaridagi noruda materiallarni qazib olishga 2024-yil 1-maydan muddatsiz moratoriy joriy qilindi. Noqonuniy qazib olish ishlari natijasida tabiatga yetkazilgan zarar uchun javobgarlik ham kuchaytirildi.
Shunga qaramay, noqonuniy qum-shag‘al qazib olish davom etmoqda. 12-fevral kuni Surxondaryo va Toshkent viloyatlarida tabiiy qum xomashyosini o‘zboshimchalik bilan qazib olish holatlari fosh etildi. Toshkent viloyati Bekobod tumanida noqonuniy ravishda qum qazib olinishi oqibatida tabiatga 100 milliard so‘mdan ortiq zarar yetkazildi.
13-yanvarda Samarqandning ikki hududida qum-shag‘al qazib olinishi oqibatida tabiatga 826 milliard so‘m zarar yetkazilgandi.
Izoh (0)