Samarqandda YPX xodimining qonuniy talabiga bo‘ysunmasdan inspektorning hayoti uchun xavfli harakatlar sodir etgan haydovchiga jazo tayinlandi. Bu haqda “Zamon” informatsion dasturida ma’lum qilindi.
1-yanvar kuni Samarqand shahar Buyuk ipak yo‘li ko‘chasida xizmat faoliyatini olib borayotgan YPX xodimi davlat raqami belgisiz harakatlanib kelayotgan Onix’ni jezl va hushtak yordamida to‘xtatish chorasini ko‘rganda, haydovchi o‘zi va o‘zgalar hayotiga xavf tug‘dirib, inspektorning qonuniy talabiga bo‘ysunmasdan, xodim ustiga haydab, tan jarohatlari yetkazgan va voqea joyidan qochib ketgandi. Holat yuzasidan jinoyat ishi qo‘zg‘atilib, haydovchi qamoqqa olingandi.
Jinoyat ishlari bo‘yicha Samarqand shahri sudida ayblanuvchi o‘sha kuni otasi mast holatda onasiga kuch ishlatayotgani haqidagi xabarni eshitgandan so‘ng uyga shoshganini aytgan va aybidan pushaymon bo‘lib, suddan yengillik berishini so‘ragan.
YPX inspektori esa sudlanuvchiga nisbatan da’vosi yo‘qligini va unga qamoq bilan bog‘liq bo‘lmagan jazo berishni so‘ragan.
Sud haydovchini Jinoyat kodeksining 219-moddasi 2-qismi (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan aybli deb topdi va 3 yil muddatga ozodligini chekladi.
Jinoyat kodeksining 219-moddasi 2-qismi — hokimiyat vakiliga yoki fuqaroviy burchini bajarayotgan shaxsga qarshilik ko‘rsatish, qanday shaklda bo‘lmasin o‘zining xizmat vazifasini bajarish yoki fuqaroviy burchini bajarishdan voz kechishga, shuningdek qonunga xilof harakatlar sodir etishga majbur qilishda aybdor deb topilgan shaxs 3 yildan 5 yilgacha ozodlikni cheklash yoki 3 yildan 5 yilgacha ozodlikdan mahrum qilish bilan jazolanadi.
Izoh (0)