Ijtimoiy tarmoqlarda Farg‘ona viloyatida YPX xodimi shorti kiygan haydovchiga bunday holda avtomobil boshqarish mumkinmasligi, buning uchun hatto ma’muriy bayonnoma rasmiylashtirilishi haqida ogohlantirgani tasvirlangan video tarqaldi. IIV YHXX holatga munosabat bildirib, shorti kiygan haydovchilarga nisbatan hech qanday jazo choralari mavjud emasligini ma’lum qildi.
16-aprel kuni Uchko‘prik tumani dehqon bozori yaqinida YPX xodimi A.O‘rinov me’yoriy hujjatlarini tekshirish maqsadida Matiz rusumli avtomobil haydovchisini to‘xtatgan. O‘zaro muloqot jarayonida YPX xodimi haydovchining kiyimiga e’tiroz bildirib, Yo‘l harakati qoidalari kitobining 55–56-sahifalarida haydovchi kiyim kiyish madaniyatiga rioya qilishi bo‘yicha band belgilanganini ta’kidlab, ma’muriy bayonnoma rasmiylashtirishi mumkinligini ham keltirib o‘tgan. Ushbu muloqot aks etgan video ijtimoiy tarmoqlarda tarqalib, keng jamoatchilik muhokamalariga sabab bo‘lgan.
Ma’lum qilinishicha, amaldagi Yo‘l harakati qoidalarida haydovchi transport vositasidan foydalanish va uni boshqarish vaqtida kiyim kiyish tartibi to‘g‘risida hech qanday izoh yoki tartib belgilanmagan. Shuningdek, Ma’muriy javobgarlik to‘g‘risidagi kodeksda ham yuqoridagi holat bo‘yicha hech qanday jazo choralari mavjud emas.
“Haydovchiga noto‘g‘ri va asossiz ma’lumot yetkazgan YPX xodimi A.O‘rinovga nisbatan xizmat tekshiruvi tayinlanganini ma’lum qilamiz”, — deyiladi munosabatda.
Avvalroq Toshkent viloyatida Matiz haydovchisi va YPX xodimlari o‘rtasida janjal sodir bo‘lgandi.
Izoh (0)