Andijon viloyatida YPX xodimiga musht tushirib, uning xizmat faoliyatiga qarshilik ko‘rsatgan qoidabuzar haydovchiga chora ko‘rildi. Bu haqda “Zamon” informatsion dasturida ma’lum qilindi.
Qayd etilishicha, 12-iyul kuni Andijon viloyati IIB JXX YHXB 6-safarbarlik guruhi inspektori, safdor xodimi kunlik taqsimotga asosan xizmatga jalb qilingan va xizmati davomida Labo rusumli transport vositasini to‘xtatgan.
Tekshiruv davomida haydovchining hujjatlarida kamchilik borligi aniqlanadi, avtomashina guvohnomasiz boshqarilgani sabab jarima maydoniga olib borilgan. Shu payt haydovchi inspektorga musht tushirib, uni xizmat vazifasini bajarishdan voz kechishga majbur qiladi.
Holat yuzasidan Andijon shahar prokuraturasi tomonidan Jinoyat kodeksining 219-moddasi (Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) 2-qismiga asosan jinoyat ishi qo‘zg‘atilib, hozirda tergov harakatlari davom ettirilmoqda.
“Ishim zaril edi, yozamiz degandan keyin tortishib qolib, musht otvordim — burniga tegib ketdi. YPX xodimidan shikoyatim yo‘q”, — deydi qoidabuzar haydovchi.
YPX xodimlarining kaltaklanish holatlari
May boshida Toshkentda YPX xodimlarining talabini bajarmasdan, ularni haqorat qilgan shaxslar 15 sutkaga qamalgani to‘g‘risida xabar berilgandi. Aprel oxirida esa Qashqadaryo viloyati Shahrisabz shahrida YPX xodimi va haydovchi o‘rtasida janjal sodir bo‘lgan edi.
Izoh (0)