Ijtimoiy tarmoqlarda Xorazm viloyati Gurlan tumanida YPX inspektori talabini bajarmagan haydovchini ko‘tarib ichki ishlar organiga tegishli bo‘lgan Damas avtomashinasiga o‘tkazgani aks etgan videolavha tarqaldi. Viloyat IIB holatga munosabat bildirildi.
Qayd etilishicha, holat mas’ul xodimlar tomonidan o‘rganib chiqilgan. Aniqlanishicha, 11-may kuni soat 19:00 larda Gurlan tumani Mustaqillik ko‘chasida xizmat olib borayotgan YPX inspektorlari ro‘parasiga yo‘lning qarama-qarshi qatnov qismiga Matiz avtomashinasi kelib to‘xtagan. Ushbu avtomashina YPX inspektori tomonidan to‘xtatilmagan bo‘lsa-da, avtomashina haydovchisi xavfsizlik kamarini taqmasdan boshqarib kelgani vizual tartibda ko‘rgan inspektor haydovchi yoniga borib unga xavfsizlik kamarini taqmasdan kelayotganini bildirib, avtomashinani boshqarish huquqini beruvchi hujjatlarni taqdim etishini so‘ragan.
Gurlan tumanida yashovchi Matiz haydovchisi R.S. (1994-yilda tug‘ilgan) o‘zining birinchi guruh nogironi ekanini ro‘kach qilib, ma’muriy javobgarlikdan qutilib qolish maqsadida, dastlab o‘zi avtomashinani boshqarmaganini bildirgan. Keyinchalik YPX inspektorining tuman ichki ishlar bo‘limiga birgalikda borish to‘g‘risidagi talabini bajarishdan qasddan bo‘yin tovlab qarshilik ko‘rsatgan. Avtomashina yo‘lovchisi bo‘lgan shu tumanda yashovchi M.Q. (1998-yilda tug‘ilgan) ham vaziyatga aralashib, haydovchini ichki ishlar organlari xodimlariga bo‘ysunmaslikka undagan.
Shundan keyin YPX inspektorlari shaxsiga aniqlik kiritish va unga nisbatan ma’muriy bayonnoma rasmiylashtirishni ta’minlash maqsadida haydovchini Matiz avtomashinasidan ko‘tarib tushirib, Damas avtomashinasida tuman ichki ishlar bo‘limiga olib borgan.
Bo‘limda haydovchining shaxsiga aniqlik kiritilganida, u mashinani 2021-yil 17-dekabr kuni hamda joriy yilning 26-yanvar va 29-mart kunlari tegishli hujjatlarsiz boshqargan. Oqibatda Ma’muriy javobgarlik to‘g‘risidagi kodeksning 135-moddasiga (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) asosan ma’muriy javobgarlikka tortilgan. Bundan tashqari, fuqaro R.S.ga shu kunga qadar umuman haydovchilik guvohnomasiga ega bo‘lmagan.
“Ushbu holatda PX inspektorlari tomonidan haydovchiga nisbatan qonunga zid xatti-harakat sodir qilinmagan, ular faqatgina yo‘l harakati qoidalarini mensimaydigan navbatdagi haydovchining huquqbuzarligiga chek qo‘yishgan”, — deyiladi xabarda.
Avvalroq Jizzaxda YPX xodimining bodikamerasidagi videoda inspektorlar haydovchini haqorat qilgani aks etgani, Farg‘onada shorti kiygan haydovchiga e’tiroz bildirgan YPX xodimiga xizmat tekshiruvi tayinlangani, Toshkent viloyatida Matiz haydovchisi va YPX xodimlari o‘rtasida janjal sodir bo‘lgani haqida xabar berilgan.
Izoh (0)