AQSH prezidenti ma’muriyati Janubiy Koreyadan 4,5 ming nafar harbiyni olib ketmoqchi. Bu haqda Pentagonning muhokamadan xabardor vakillariga tayanib The Wall Street Journal xabar berdi.
Ma’lum qilinishicha, Janubiy Koreya hududida jami 28,5 mingga yaqin AQSH harbiylari bor. Rasmiylar qo‘shinlarni Tinch okeaniga, jumladan, Guam oroliga ko‘chirish variantlarini ko‘rib chiqmoqda. Tashabbus Shimoliy Koreyaga qarshi kurash siyosati doirasida muhokama qilinmoqda. Pentagon vakili Pit Nguyenning aytishicha, AQSH prezidenti Shimoliy Koreyani “to‘liq yadrosizlantirish” g‘oyasiga sodiq.
Ikki amaldorga ko‘ra, taklif hali Amerika prezidentiga ko‘rib chiqish uchun kelib tushmagan. Hozircha u muhokama bosqichida. Prezident Donald Tramp aprel oyi boshida Yevropada joylashtirilgan AQSH harbiy kontingenti soni qisqarishi mumkinligini aytgandi. NBC nashri esa AQSH Yevropadan 10 minggacha harbiyni olib chiqib ketish imkoniyatini ko‘rib chiqayotganini xabar qilgandi.
Amerika rasmiylari ta’kidlashicha, Ukrainadagi mojaro qaysi yo‘nalishda kechishi va Tramp ma’muriyati Kiyevni harbiy qo‘llab-quvvatlashda davom etishi aniq bo‘lmaguncha, qo‘shinlar soni bo‘yicha qaror qabul qilinmaydi.
AQSHning xorijdagi eng yirik Kemp Xamfris harbiy bazasi Pxentek shahrida (Janubiy Koreya) joylashgan. Boshqa yirik bazalarga Kunsan va Osan aviabazalari kiradi. Bu bazalarda AQSH armiyasi va harbiy-havo kuchlarining turli bo‘linmalari joylashgan. Ular mintaqaning mudofaasi va xavfsizligiga hissa qo‘shadi.
Izoh (0)