Janubiy Koreya politsiyasi mamlakat janubi-sharqida keng ko‘lamli o‘rmon yong‘inlariga sabab bo‘lgan o‘rmonga o‘t qo‘yishda gumon qilinayotgan 56 yoshli erkakni qo‘lga oldi. Bu haqda Yonhap agentligi xabar bermoqda.
Qo‘lga olingan shaxs 22-mart kuni soat 11:25 atrofida Shimoliy Kyonsan viloyatining Uison tumanidagi tepalikda joylashgan oilaviy qabrda ajdodlarni xotirlash marosimini o‘tkazayotganda yong‘in chiqarganlikda ayblanmoqda. Kuchli shamol va quruq ob-havo tufayli olov tezda yaqin atrofdagi Andon, Chxonson, Yonyan va Yondok shaharlariga tarqalib, 27 kishining halok bo‘lishiga olib keldi.
O‘rmon yong‘ini 4000 ga yaqin inshootni, jumladan, YUNESKOning Butunjahon merosi ro‘yxatiga kiritilgan Goun ibodatxonasini, turar-joy binolari, zavodlar va boshqa obyektlarni vayron qilgan. 20 mingdan ortiq aholi o‘z hududlaridan ko‘chib ketishga majbur bo‘lgan. Ofatga qarshi kurashga 5 mingga yaqin harbiy xizmatchi va 146 ta vertolyot jalb etilgan.
Politsiya ma’lumotlariga ko‘ra, gumonlanuvchi o‘z aybini tan olmagan.
Koreya o‘rmon xizmati Shimoliy Kyonsan viloyatidagi o‘rmon yong‘inlari 28-mart kuni soat 17:00 holatiga ko‘ra to‘liq nazoratga olinganini ma’lum qilgandi, biroq 29-martga o‘tar kechasi ular yana kuchayib ketgan. 30-mart holatiga ko‘ra, yong‘in 99 foizga nazorat ostiga olingan. Hukumat 50 ta vertolyot, 1500 ga yaqin odam va 213 ta transport vositasini safarbar etgan.
O‘rmon xo‘jaligi agentligi ma’lumotlariga ko‘ra, Janubiy Koreyadagi eng yirik o‘rmon yong‘ini oqibatida 48 ming gektarga yaqin o‘rmon maydoni, ya’ni Seul maydonining taxminan 80 foizi kuyib ketgan.
Izoh (0)