Britaniya va Germaniya birgalikda 2 000 kilometrdan uzoq masofaga zarba bera oladigan yangi qurol ishlab chiqadi. Bu haqda Britaniya hukumatiga tayanib Reuters xabar berdi.
Loyiha 2024-yili ikki tomon imzolagan mudofaa paktiga asosan amalga oshirilmoqda. Unda Yevropa Ukrainadagi urushning kuchayishidan o‘zini himoya qila olishi zarurligi ko‘zda tutilgan. Bayonotda loyihaning muddati va byudjeti haqida batafsil ma’lumot berilmagan.
Britaniya mudofaa vaziri Jon Gili va uning germaniyalik hamkasbi Boris Pistorius Berlindagi uchrashuvda uzoq masofaga uchuvchi qurollarning yangi loyihasi e’lon qilinishini aytgan.
“Tobora xavfli bo‘lib borayotgan dunyoda NATO va Yevropa ittifoqchilari birdam. Ushbu hamkorlik bizga mudofaani o‘sish dvigateliga aylantirishga yordam beradi. Xususan, ish o‘rinlari yaratiladi, ko‘nikmalar oshiriladi. Buyuk Britaniya va Germaniyaga sarmoyalar kirib keladi,” dedi Jon Gili.
Vazirlar dengiz patrul va razvedka samolyotlari uchun torpedalarni sotib olishni muhokama qilishi rejalashtirilgan. Germaniya Britaniyada ishlab chiqarilgan harbiy ko‘priklarni sotib olishi bo‘yicha kelishuv imzolanishi ham kutilmoqda.
Rossiyaning boshqa davlatlarga ehtimoliy hujumi
NATO doiralaridagi manbalarga ko‘ra, Rossiya Finlyandiya va NATOning sharqiy qanotidagi boshqa davlatlarga hujum qilish rejasini ishlab chiqqan. Gap Rossiya armiyasining bir nechta bo‘linmalarining bir vaqtning o‘zida hujumi haqida ketmoqda. Unga o‘n minglab askar jalb qilinishi ehtimoli borligi aytilgan.
Financial Times nashriga ko‘ra, Rossiya Yaponiya va Janubiy Koreya bilan ehtimoliy urush uchun nishonlarning batafsil ro‘yxatini tuzgan. Ro‘yxatga 160 ta harbiy va fuqarolik infratuzilmasi obyektlari — atom elektr stansiyalari, ko‘priklar, zavodlar va qo‘mondonlik punktlari kiritilgan. 2008–2014-yillardagi maxfiy hujjatlar X-101 raketalari bilan zarbalar berishni va Yaponiya hamda Janubiy Koreyaning havo mudofaasini tekshirishni tasvirlaydi.
Yevropa diplomatiyasi rahbari Kaya Kallas Rossiya 2028-yildayoq Yevropa ittifoqiga hujum qilishi mumkinligini aytib, Yevropani mudofaa xarajatlarini oshirishga chaqirgan. NATO bilan urush 4-6 yildan keyin bo‘lishi mumkinligi ta’kidlangan.
Buyuk Britaniya Rossiya hujumiga tayyorgarlik ko‘rishni boshladi. Londonda 2005-yildan beri ilk bor favqulodda holatdagi harakatlar rejasi qayta ko‘rib chiqilmoqda. U yadroviy hujumga reaksiya va bunkerlardan foydalanish tartibini o‘z ichiga oladi.
Izoh (0)