Bir fanga bo‘lgan muhabbat va tirishqoqlik ortidan sharq-u g‘arbning nufuzli bilim dargohlarini zabt etish mumkinmi? Albatta, mumkin. Xalqaro darajadagi iqtisodchi-moliyachi, qator ilmiy izlanishlar muallifi, ko‘plab yirik tashkilotlarda ish tajribasiga ega tahlilchi Ibrohimjon Abdullayev o‘z misolida buni isbotladi.
Hozirda AQSHning Linkoln universitetida Biznes boshqaruvi (DBA) bo‘yicha doktorantura tahsilini olayotgan Ibrohimjon Abdullayev 1995-yili Andijon viloyatining Marhamat tumanida tug‘ilgan. Maktabda matematika ustozining fanni sodda va ravon tushuntirishi hamda aniqlikka bo‘lgan qiziqish bu sohani ayricha mehr bilan o‘rganishga turtki bo‘ldi. Tirishqoqlik, izlanish, maktab va tuman miqyosidagi olimpiadalarda ishtirok va qarabsizki, 2014-yilda matematika bo‘yicha respublika olimpiadasida 1-o‘rin.
Ibrohimjon shu nuqtadan boshlangan bilim va muvaffaqiyat sari yo‘li haqida “Daryo”ga hikoya qilib berdi.
Ham mas’uliyat, ham imkoniyat
Matematikaga bo‘lgan qiziqish, raqamlar mo‘jizasi bu fan bilan jiddiy shug‘ullanishimga sabab bo‘lgan. Bu qiziqish amaliy natija bera boshlaganida esa kelajagimni ham matematika bilan bog‘lashga qaror qildim. Respublika olimpiadasidagi g‘alaba kattaroq muvaffaqiyatlarga undadi, o‘zimga ishonchimni oshirdi, mas’uliyat yukladi.
Chet elda tahsil olish imkoniyatlarni karrasiga oshirishini bilgan holda, xorijiy oliygoh talabasi bo‘lishni maqsad qildim. Tinimsiz o‘qish-izlanish, puxta tayyorlov natijasi o‘laroq 2015-yilda Janubiy Koreyaning Seul shahridagi Sejong universitetining Biznes boshqaruvi yo‘nalishi bakalavr bosqichiga qabul qilindim. 2019-yilda universitetda o‘tkazilgan “Eng yaxshi moliyachi” tanlovida 1-o‘rinni qo‘lga kiritdim.
Ilm istab ummon ortiga
Bakalavriatdan keyin AQSHning nufuzli ta’lim dargohlarida ham bilim olsam, degan fikr o‘y-xayolimni band qildi. Karantin davrida bu orzu qat’iy maqsadga aylandi va tayyorlanishga kirishdim. 2021-yilda Kaliforniya shtati Oklend shahridagi Linkoln universitetining Moliyaviy boshqaruv (MBA) yo‘nalishida magistratura bosqichiga qabul qilindim. Hozirda Biznes boshqaruvi (DBA) dasturi bo‘yicha doktorantura tahsilini ham shu universitetda davom ettiryapman.
Tahsil barobarida xalqaro moliyaviy xavflar, kredit risklari va barqaror iqtisodiy model tahlillari bo‘yicha tadqiqot olib boryapman. Bundan tashqari, ilmiy faoliyatim davomida xalqaro miqyosda e’tirof etilgan International Journal of Finance&Banking Studies, Journal of Emerging Financial Markets, Global Economics Review kabi nufuzli jurnallarda 10 dan ortiq maqolam chop etildi. Shuningdek, Risklarni boshqarish bo‘yicha professionallar global assotsiatsiya (GARP) va Xalqaro moliyaviy menejment assotsiatsiyasi (FMA) kabi yirik tashkilotlarga a’zo bo‘ldim, bunday muhit professionalizmni takomillashtirishimda muhim rol o‘ynaydi.
Milliy va xalqaro tajriba
Ilk ish tajribam O‘zbekistonda boshlangan – Milliy bankda amaliyot o‘taganman. Kredit portfelini tahlil qilish, mijozlar kreditini baholash va risklar to‘g‘risida hisobot tayyorlash, makroiqtisodiy tadqiqotlar o‘tkazish, audit, shuningdek, kichik va o‘rta tadbirkorlik subyektlari uchun moliyaviy modellar yaratish bo‘yicha o‘zimni sinab ko‘rdim.
2020 – 2021-yillarda Seuldagi Vroong kompaniyasida faoliyat yuritdim. Dastlab moliyaviy tahlilchi, so‘ng rekruting menejeri sifatida ishlab, yirik xorijiy tashkilotda mas’uliyatli vazifada ishlashning ta’mini totdim. Kompaniyaning mintaqaviy kengayishida kadrlar rejalashtiruvini strategik jihatdan boshqarish jarayonida soham bo‘yicha amaliy ko‘nikmalarim takomillashib bordi, moliya va inson kapitali o‘rtasidagi bog‘liqlikni chuqurroq tushundim.
Keyinchalik O‘zbekiston Respublikasi Kadastr vazirligida byudjetni rejalashtirish bo‘yicha maslahatchi sifatida ham ishladim. Davlat byudjetini tahlil qilish, resurslar taqsimoti samaradorligini oshirish hamda fiskal strategiyalarni shakllantirish jarayonida ishtirok menga tengsiz amaliy tajriba berdi.
Liderlarga ko‘mak
Faoliyatim davomida faqat moliya-iqtisod sohasi bilan cheklanib qolmaslikka harakat qilganman. O‘zim qachonlardir bosib o‘tgan yo‘l – nufuzli xorijiy oliygohlar talabasi bo‘lishda yangi avlodga to‘g‘ri yo‘l-yo‘riq ko‘rsatish istagi amalga ko‘chdi – 2016-yilda Leader Academy nomli ta’lim agentligiga asos soldim.
Agentlik xorijiy tillarni o‘rganish, SAT imtihonlariga tayyorlov, xalqaro universitetlarga hujjat topshirish borasida 2000 dan ortiq o‘quvchiga yordam berdi, 300dan ortiq o‘quvchining AQSH, Koreya va Yevropadagi nufuzli universitetlarga qabul qilinishiga erishdi. Agentlikni boshqarish davomida 20dan ziyod konsultant va instruktorlardan iborat jamoani boshqarish men uchun yangi tajriba bo‘ldi. 4 yil davomida barqaror o‘sishni qayd etgan biznesimni 2020-yilda shaxsiy rejalarim sababli sotishimga to‘g‘ri keldi.
Ulkan maqsadlar, ezgu maqsadlar
Maqsadlar katta, shijoat zo‘r, to‘xtab qolish yo‘q. Salohiyat va ko‘nikmalarimni muntazam takomillashtirib borish, ilm-fanga asoslangan yondashuvlar orqali global moliya tizimini rivojlantirishga hissa qo‘shishni o‘zimning bosh maqsadim deb bilaman. Buni amalga oshirish uchun doktoranturani tamomlagach faoliyatimni nufuzli xalqaro moliya institutlarida davom ettirishni rejalashtiryapman.
Qolaversa, kelgusida faqat o‘z mutaxassisligim bilan cheklanib qolmoqchi emasman. Yoshlar turli yo‘nalishlarda bilim olishlari mumkin bo‘lgan ochiq ta’lim platformalarini yo‘lga qo‘yish niyatim bor. Bu bo‘yicha universitetdagi ilmiy rahbarim bilan birgalikda harakatlarni boshlaganmiz. Toki o‘qiyman degan har bir yosh yigit-qiz o‘ziga kerakli bilimni sifatli va tartibli ola bilsin, harakatlarini maqsadli yo‘naltira olsin, ilmiy mentorga ega bo‘lsin. Bu xalqaro darajadagi mutaxassislarni tayyorlash yo‘lida muhim vosita o‘laroq xizmat qiladi, deb o‘ylayman.
Saidaziz A’zamov suhbatlashdi
Izoh (0)