Amerika Qo‘shma Shtatlari prezidenti Donald Tramp va mudofaa vaziri Pit Xegset 20-may kuni koinotga qurol-yarog‘ olib chiqishni ko‘zda tutuvchi “Oltin gumbaz” rejasini e’lon qildi. Bu haqda Al Jazeera xabar berdi.
Oq uyda nutq so‘zlagan Tramp gipertovushli va ballistik raketalar hamda ilg‘or qanotli raketalarni urib tushirishga mo‘ljallangan tizim uchun arxitektura tanlaganini ma’lum qildi.
“Men Amerika xalqiga vatanimizni xorijiy raketa hujumi tahdididan himoya qilish uchun eng zamonaviy qalqon qurishga va’da bergan edim. “Oltin gumbaz“ mudofaa tizimi dunyoning istalgan nuqtasidan, hatto koinotdan uchirilgan rekatalarni urib tushirishga qodir bo‘ladi. Eng yaxshi tizim bizda yaratiladi,” dedi Tramp.
Uning qo‘shimcha qilishicha, “Oltin gumbaz” tizimiga kosmik sensor va interseptorlar kiradi.
Bundan atigi 4 oy oldin Tramp ushbu dasturni ishlab chiquvchi farmonni imzolagan edi. Dasturni hozirda AQSH armiyasining kosmik kuchlari kosmik operatsiyalar bo‘yicha vitse-boshlig‘i general Maykl Getleyn boshqarmoqda.
Tadbirda so‘zga chiqqan Xegset rejani “Amerika va amerikaliklar xavfsizligiga avlod sarmoyasi”, deb atagan.
Oq uy raketaga qarshi mudofaa tizimi haqida qo‘shimcha ma’lumotlarni darhol e’lon qilmagan. Pentagon hali ham uning imkoniyatlari va talablarini ishlab chiqayotgani aytilmoqda.
Kongressning Byudjet boshqarmasi shu oy boshida faqat “Oltin gumbaz”ning kosmik komponentlari keyingi 20 yil ichida 542 milliard dollarga tushishi mumkinligini taxmin qilgan edi. Kosmik tizim samarali bo‘lishi uchun ayniqsa, Shimoliy Koreya kabi xorijiy harbiylar tobora takomillashib borayotgan bir paytda, ko‘plab sensorlar va interseptorlar kerak bo‘lishi ta’kidlandi.
“Bu dastur mening prezidentlik muddatim tugagunga qadar to‘liq ishga tushishi kerak. Shunday ekan, buni uch yil ichida amalga oshiramiz,” dedi Tramp.
Prezident umumiy xarajatlarni taxminan 175 milliard dollarga baholagan. Tizimni qurish uchun mavjud mudofaa imkoniyatlaridan foydalanish rejalashtirilgani qo‘shimcha qilingan.
Tramp hozirda ushbu tizim uchun 25 milliard dollar talab qilinishini tasdiqladi. Ammo bu summa qisqartirilishi mumkinligi ta’kidlandi.
Tramp “Oltin gumbaz” dasturiga qaysi kompaniyalar jalb etilishini aytmagan. Buning o‘rniga, u tizim Alyaska, Indiana, Florida va Jorjiya kabi shtatlarda sanoatga turtki berishini ta’kidlagan.
Izoh (0)