Ukrainalik uchuvchi, 26 yoshli Pavlo Ivanov halok bo‘ldi. U Qo‘shma Shtatlarda ishlab chiqarilgan F-16 qiruvchi samolyotida jangovar topshiriq bajarayotgan edi. Bu haqda Ukrinform agentligi mamlakat harbiy havo kuchlariga tayanib xabar berdi.
“2025-yilning 12-aprel kuni F-16 samolyotida uchayotgan 26 yoshli Pavlo Ivanov jangovar topshiriqni bajarish chog‘ida halok bo‘ldi. Uning oilasiga chuqur hamdardlik bildiramiz. Pavlo vatanini bosqinchilardan himoya qilayotib, jangda halok bo‘ldi”, deyiladi rasmiy bayonotda.
Ukrainaga G‘arb namunasidagi qiruvchilarni yetkazib berish qarori Bayden ma’muriyati davrida qabul qilingan. Shunga qaramay, AQSH Kiyevga o‘z inventaridan samolyot yetkazib bermadi. Balki Yevropadagi ittifoqchilariga buning uchun “yashil chiroq” yondi.
Niderlandiya, Daniya hamda Belgiya kabi davlatlar 2024-yilning so‘nggi choragidan buyon Ukrainaga noma'lum miqdordagi qiruvchilarni yetkazib berdi. Ular zamonaviy avionika bilan modernizatsiya qilingan bo‘lib, rus kuchlarining dron va raketa hujumlarini qaytarish, mamlakat havo hududini Rossiya samolyotlaridan himoyalash hamda quruqlik nishonlariga zarba berish kabi missiyalarda qo‘llanmoqda.
Ukraina mulozimlari uchuvchining halokatiga sabablar, shuningdek, samolyot taqdiri haqida ma’lumot bermadi. Voqea yuzasidan idoralararo komissiya tuzilgan bo‘lib, tergov ishlari boshlab yuborilgan.
Izoh (0)