AQSH prezidenti Donald Tramp sobiq davlat rahbari Jo Bayden prostata saratoniga chalinganiga munosabat bildirdi. U o‘z fikrlarini Truth Social ijtimoiy tarmog‘ida yozib qoldirdi.
Melaniya va men Jo Baydenning yaqinda qo‘yilgan tibbiy tashxisi haqidagi xabardan xafa bo‘ldik. Biz Jill va uning oilasiga eng iliq va samimiy tilaklarimizni bildiramiz, Joga esa tezroq va muvaffaqiyatli sog‘ayib ketishini tilaymiz, dedi Tramp.
Saratonga chalingan Baydenni u bilan birga ishlagan AQSH sobiq vitse-prezidenti Kamala Harris ham qo‘llab-quvvatladi. U mazkur xabardan tushkunlikka tushganini ma’lum qildi.
Jo — jangchi va men bilamanki, u bu chaqiriqni uning hayoti va yetakchiligini belgilab bergan kuch, matonat va optimizm bilan yuz tutadi. U to‘liq va tezroq sog‘ayib ketishiga umid qilamiz, dedi Harris.
Ma’lumot o‘rnida, 16-may kuni 82 yoshli Baydenga prostata bezi saratonining agressiv shakli tashxisi qo‘yildi. Metastazlar allaqachon suyaklarga o‘tgan. Hozirda sobiq prezident va oilasi shifokorlar bilan davolash usullarini ko‘rib chiqmoqda.
Prostata saratoni bo‘yicha mutaxassislar fikricha, Baydenning tashxisi juda jiddiy va saraton suyaklarga tarqalishi bilan uni davolab bo‘lmaydi. Shunga qaramay, ba’zi shifokorlar saratonning bunday shakli bilan 10 yilgacha yashash mumkin deb hisoblaydi.
Bayden 1942-yil 20-noyabrda Pensilvaniya shtatining Skranton shahrida tug‘ilgan. U 36 yil davomida AQSH Senatida Delaver shtati vakili bo‘lgan. So‘ngra 2009—2017-yillarda Barak Obama ma’muriyatida 47-vitse-prezident lavozimida ishlagan.
Bayden 2020-yildan 2024-yilgacha AQSH prezidenti sifatida faoliyat yuritgan. 2024-yilgi AQSH prezidentlik saylovlarida Bayden dastlab ikkinchi muddatga nomzodini qo‘yishni rejalashtirgan, biroq keyinroq poygadan chiqishini e’lon qilgandi.
Izoh (0)