O‘zbekiston va Buyuk Britaniya hamkorlik dasturi imzolandi. Bu haqda Baxtiyor Saidov o‘z sahifasida ma’lum qildi.
Unga ko‘ra, London shahrida tashqi ishlar vaziri Baxtiyor Saidov Buyuk Britaniya tashqi ishlar vaziri Devid Lemmi bilan uchrashuv o‘tkazdi. Tomonlar O‘zbekiston va Buyuk Britaniya o‘rtasidagi do‘stona munosabatlar izchil rivojlanib borayotganini ta’kidlab, 2025-yilga mo‘ljallangan keng va istiqbolli kun tartibini atroflicha muhokama qildi.
Uchrashuv davomida savdo, investitsiya, madaniy-gumanitar sohalar hamda global chaqiriqlarga qarshi hamkorlikni qamrab olgan yo‘nalishlar bo‘yicha fikr almashildi. Tomonlar o‘zaro farovonlik va barqarorlik yo‘lida umumiy intilishlarini yana bir bor tasdiqladi.
Tashrif doirasida O‘zbekiston va Buyuk Britaniya tashqi siyosat idoralari o‘rtasida 2025–2026-yillarga mo‘ljallangan hamkorlik dasturi imzolandi. Uchrashuv iliq va konstruktiv ruhda o‘tdi.
Buyuk Britaniya O‘zbekistonning Jahon savdo tashkilotiga a’zo bo‘lish jarayonini to‘liq qo‘llab-quvvatlashini tasdiqlagan edi. Shuningdek, Buyuk Britaniya konsorsiumi O‘zbekistonda transport va energetika sohalaridagi loyihalarni amalga oshirishi xabar qilingandi.
Izoh (0)