Shavkat Mirziyoyev 7-may kuni tibbiyotning birlamchi bo‘g‘ini va ixtisoslashgan muassasalarda xizmatlar sifatini yanada oshirish, dori vositalari iste’molini tartibga solish hamda tibbiy ta’limni takomillashtirish bo‘yicha ustuvor vazifalar yuzasidan videoselektor yig‘ilishida sohadagi ayrim kamchiliklarni tanqid qildi.
Qayd etilishicha, so‘nggi 7 yilda tibbiyotga ajratilayotgan mablag‘ 6 karra oshgan va 2025-yilda 42 trillion so‘mga yetgan. Mahalladagi birlamchi bo‘g‘in bilan ixtisoslashgan xizmatlarni bog‘laydigan kompleks tizim yaratildi. Ilgari faqat poytaxtda bajarilgan 400 dan ortiq yuqori texnologik amaliyot viloyat va tumanlarda o‘tkazilmoqda. Birgina buyrak ko‘chirish amaliyoti kuniga ikkitadan bajarilmoqda.
Mamlakatda har 10 ming aholiga 27 nafar shifokor to‘g‘ri keladi. Bu AQSH, Buyuk Britaniya, Finlyandiya bilan bir xil ko‘rsatkich. Turkiya va Kanadada bu raqamlar 1,5 baravar kam.
“Ko‘rib turibsiz, bizda tibbiyot xodimlari sonida ham, moliyalashtirishda ham muammo yo‘q. Lekin sifat-chi? Bu borada e’tirozli savollar juda ko‘p”, dedi davlat rahbari.
Yig‘ilishda aytilishicha, O‘zbekistonda yuqumli bo‘lmagan kasalliklar iqtisodiyotga har yili 1 milliard dollar zarar keltirishi hisob-kitob qilingan. Tez yordamdagi jami chaqiruvlarning to‘rtdan biri surunkali kasalliklari bor bemorlarga to‘g‘ri kelmoqda.
Masalan, Farg‘onadagi 12 ta mahallada o‘tkazilgan o‘rganishda har 10 nafar bemordan 8 nafari oilaviy shifokorni chetlab o‘tib, shifoxonaga yoki xususiy klinikaga borayotganini aytgan. Xorazmda esa bemorlar oilaviy shifokorni emas, tez yordamni afzal ko‘ryapti. Sodda qilib aytganda, tez yordam xuddi poliklinikadek bo‘lib qolgan. Andijon, Namangan va Samarqand shahrida poliklinika shifokori kuniga 50-60 nafar bemorni qabul qilyapti. Bu hech qanday tibbiy standartlarga to‘g‘ri kelmaydi.
Prezident Buxoroda oilaviy shifokorlar profilaktika, skrining va davolash bilan shug‘ullanish o‘rniga bemorni shifoxonaga yo‘naltiruvchi “dispetcher” bo‘lib qolganini aytib o‘tdi.
Bu masalalarni na sog‘liqni saqlash mas’ullari, na hokimlar o‘ylab ko‘rmagani qayd etildi. Viloyat va tuman shifoxonalarida vrachlar, o‘rinlar, mablag‘larni to‘g‘ri taqsimlashda kamchiliklarga yo‘l qo‘yilayotgani qayd etildi.
Izoh (0)