O‘zbekiston va Buyuk Britaniya mas’ullari siyosiy muloqotni yangi bosqichga ko‘tarishni muhokama qildi

O‘zbekiston Tashqi ishlar vazirligi delegatsiyasi Londonda qator ikki tomonlama uchrashuvlar o‘tkazdi. Bu haqda vazirlik matbuot xizmati xabar berdi.

Ma’lum qilinishicha, 7-dekabr kuni Londonda tashqi ishlar vaziri o‘rinbosari Bobur Usmonov Buyuk Britaniya tashqi ishlar, hamdo‘stlik va taraqqiyot masalalari bo‘yicha davlat kotibining parlamentar o‘rinbosari Leo Dokerti, Buyuk Britaniya bosh vazirining Afg‘oniston bo‘yicha maxsus vakili Endryu Makkubri, Parlamentlararo ittifoqdagi Britaniya guruhi (BGIPU) raisi, Buyuk Britaniya parlamenti deputati Karen Bredli bilan uchrashuvlar o‘tkazgan.

Muzokaralar chog‘ida ikki mamlakat o‘rtasidagi siyosiy, parlamentlararo, savdo-iqtisodiy va madaniy-gumanitar aloqalarning bugungi holati va ularni rivojlantirish istiqbollari muhokama qilingan.

“So‘nggi yillarda O‘zbekiston bilan Buyuk Britaniya o‘rtasidagi munosabatlarda ijobiy sur’at kuzatilayotgani qayd etildi. Siyosiy muloqotni sifat jihatidan yangi bosqichga ko‘tarishdan o‘zaro manfaatdorlik bildirildi”, — deyiladi xabarda.

Eslatib o‘tamiz, noyabr oxirlarida O‘zbekiston tashqi ishlar vaziri Baxtiyor Saidov Buyuk Britaniyaning tashqi ishlar, hamdo‘stlik va taraqqiyot masalalari bo‘yicha davlat kotibi etib tayinlangan Devid Kemeron bilan uchrashgan edi.