Davlat xavfsizlik xizmati fuqarolarni AQSHga noqonuniy yo‘llar bilan yuborishga uringan mahalliy hamda xorijiy fuqarolarning harakatlariga chek qo‘yilganini ma’lum qildi.
DXX tomonidan Bosh prokuratura huzuridagi Iqtisodiy jinoyatlarga qarshi kurashish departamenti hamkorligida Toshkent shahrida o‘tkazilgan tezkor tadbirda Samarqand shahrida yashovchi, 1992-yilda tug‘ilgan fuqaro xorijiy fuqaroning ishonchiga kirib, uni va 4 nafar oila a’zolarining har birini 30 ming dollardan, jami 150 ming dollar evaziga Turkiya orqali AQSHga ishlash uchun yuborishini aytgan.
Viza hujjatlarini mansabdor tanishlari orqali tayyorlab berishi uchun oldindan 15 ming dollar olgan vaqtida ushlangan.
Toshkentda vaqtincha istiqomat qilib kelayotgan 2004-yilda tug‘ilgan xorijiy fuqaro boshqa chet et fuqarosining ishonchiga kirib, unga Buyuk Britaniya soxta fuqarolik pasportlarini tayyorlatib berish imkoniyati borligini aytgan. So‘ngra, mazkur soxta pasportlar yordamida AQSHga Turkiya va BAA orqali ularni jo‘natib yuborishi evaziga jami 25 ming dollar talab qilgan.
O‘tkazilgan tezkor tadbirlar natijasida ushbu fuqaro oldindan 12,500 dollar olgan vaqtida ushlangan. Shuningdek, uning yashash xonadonidan qalbaki pasport va ID-kartalar ham ashyoviy dalil sifatida olingan.
Har ikkala holatlar yuzasidan Jinoyat kodeksining 168-moddasi (firibgarlik) 4-qismi “a” bandi va 28,211-moddasi (pora berish) 3-qismi “a” bandi bilan jinoyat ishlari qo‘zg‘atilib, tergov harakatlari olib borilmoqda.
O‘zbekistondan AQSHga noqonuniy borish bilan bog‘liq firibgarlik holatlari haqida xabar berilishiga qaramay, bunday holatlar tez-tez qayd etilmoqda. May oyining boshlarida Jizzaxda fuqaroni Meksika orqali AQSHga jo‘natmoqchi bo‘lgan shaxs ushlangandi. 26-mart kuni Sirdaryo va Navoiy viloyatlarida 38 ming va 14 ming dollar evaziga AQSHga ishga yuborishni va’da qilgan shaxslar ushlandi. Undan avval Toshkentning Chilonzor tumanida AQSHga ishga yuborish uchun 40 ming dollar olgan kishi ushlangandi.
Izoh (0)