“Daryo” nashri 1-martda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Ukraina va Rossiyaning shiddatli jang maydoni, Baxmutdan chekinish
Bir necha oydan janglar kechayotgan Donetskdagi Baxmut shahridan ukrainalik harbiylar “strategik chekinish”ni boshlashi mumkin. Bu haqda Ukraina prezidentining iqtisodiy masalalar bo‘yicha maslahatchisi Aleksandr Rodnyanskiy CNN telekanaliga ma’lum qildi.
Xabarga ko‘ra, Rossiya hozir Baxmutni o‘rab olishga urinmoqda va buning uchun ular eng sara ‘Vagner’ bo'linmalaridan foydalanyapti
“Ko‘rinishidan, ular juda yaxshi o‘qitilgan va katta tajribaga ega. Bizning armiyamiz barcha variantlarni ko‘rib chiqishga urinadi. Ular hozircha shaharni ushlab turibdi, lekin kerak bo‘lsa, strategik orqaga chekinadi, chunki biz odamlarning barchasini bekordan bekorga qurbon qilmoqchi emasmiz”, — degan maslahatchi. Uning ta’kidlashicha, chekinish haqidagi qaror Ukraina harbiylarining ixtiyorida qolmoqda.
Manbaning qayd etishicha, Baxmutdan g‘arbdagi hudud mustahkamlangan, shuning uchun Ukraina Qurolli kuchlari shahardan chekingan taqdirda ham, Rossiya kuchlari tezda oldinga siljiy olmaydi.
Hozirda Rossiya Baxmutni egallash uchun kuchli tajribaga ega Vagner jangchilaridan foydalanayotgan bo‘lsa, Ukraina Qurolli kuchlarining harbiy salohiyati qay darajada?
CNN xabariga ko‘ra, fevral oyida AQSH Mudofaa vazirligi 1000 dan ortiq ukrainalik harbiylarni jangga tayyorladi.
Xususan, Oklaxoma shtatidagi Fort-Sillda Patriot havo mudofaa tizimi bilan ishlovchi guruh tayyorlanmoqda va ular tez orada tayyorgarlikni yakunlab ortga qaytadilar.
Bugungacha Ukraina harbiylari Buyuk Britaniya, Germaniya, Daniya va Polsha kabi boshqa G‘arb davlatlarida ham o‘qitilmoqda.
Xususan Germaniyadagi Ukraina askarlari Leopard 2 tankini boshqarishni o‘rganayotgan bo'lsa, Buyuk Britaniyadagi ukrainalik uchuvchilar esa G‘arb jangovar samolyotlarida mashq qilishni boshlagan.
Yevropa Ittifoqi davlatlari atom energetikasini mustahkamlash uchun birlashmoqchi, Rossiya bunda qaysi yo‘ldan boradi?
Bolgariya, Xorvatiya, Chexiya, Finlyandiya, Fransiya, Vengriya, Niderlandiya, Polsha, Ruminiya, Slovakiya va Sloveniya mavjud atom stansiyalari bilan bir qatorda “yangi loyihalarni qo‘llab-quvvatlashga” kelishib oldi. Bu haqda Stokgolmdagi Yevropa Ittifoqi energetika vazirlari yig‘ilishi bayonotida xabar berildi.
Misol uchun, uzoq vaqtdan beri atom energiyasiga tayanib kelgan Fransiya Yevropa atom energetikasi bo‘yicha yaqinroq aloqalarni o‘rnatishga harakat qilmoqda. Fransiyaning maqsadi “Yadroviy ittifoq yaratish” hisoblanadi.
Ammo bu masalaga bir qancha davlatlar keskin qarshilik ko‘rsatmoqda. Tanqidlar asosan Germaniya va Ispaniya tomonidan bo‘lyapti.
Hozirda Yevropa Ittifoqi elektr energiyasi bozorini isloh qilish masalasini muhokama qilmoqda. Blok bu borada hali bir to'xtamga kelmadi.
Yevropa davlatlari kelajak uchun himoya rejasini tuzayotgan ayni vaziyatda neft embargosiga uchragan Rossiya Hindistonga maksimal miqdorda neft yetkazmoqda. Bloomberg ma'lumotlariga ko'ra, fevral oyida Nyu-Dehli Rossiyadan kuniga taxminan 1,85 million barrel neft import qilgan.
Dengizdagi neft ta’minoti uchun narx chegarasi kuchga kirgandan so‘ng, Rossiya resursining katta qismi Xitoy va Hindistonga yo‘naltirildi.
Bloomberg ma’lumotlariga ko‘ra, Hindiston neftni Rossiyadan chegirma bilan sotib oladi va qayta ishlangach, yonilg‘ini Yevropaga jo‘natadi.
O’zbekistonga kirib kelayotgan AQSH va Rossiya hamkorliklari
Toshkentda 1-mart kuni O‘zbekiston—AQSH muzokaralari boshlandi. Tashrifdan ko‘zlangan asosiy maqsad O‘zbekiston—AQSH strategik sherikligini yanada rivojlantirish masalalarini muhokama qilish.
"Biznes almashinuvlari uchun qulay sharoitlar yaratish, O‘zbekiston kadrlar salohiyatini oshirish, Markaziy Osiyoda mintaqaviy xavfsizlikni mustahkamlash va boshqa qator masalalar bo‘yicha harakatlarimizni birlashtirishga kelishib oldik”,– deb yozadi tashqi ishlar vaziri vazifasini bajaruvchi Baxtiyor Saidov o‘z Telegram kanalida.
Bu AQSH davlat kotibining O‘zbekistonga birinchi tashrifi hisoblanadi. Ushbu tashrifdan avval Blinken Qozog‘istonning Ostona shahrida “C5+1” formatidagi (Markaziy Osiyo + AQSH) uchrashuvda ishtirok etdi.
Ushbu yig‘ilishda AQSh va Markaziy Osiyoning 5 ta davlati, xususan O'zbekiston ham iqtisodiy, energetika, atrof-muhit va xavfsizlik sohasidagi hamkorlik masalalarini muhokama qilgan.
Shu bilan birga O'zbekistonga hamkorliklar uchun kirib kelayotgan davlat faqat AQSH gina emas.
Poytaxt hokimligi matbuot xizmatining xabariga ko'ra, Rossiyaning LLK-International kompaniyasi Toshkent yo'llarini ta’mirlashga yordam beradi. Bunga Toshkent shahar hokimi vazifasini bajaruvchi Baxtiyor Rahmonov hamda LLK-International mutasaddilari bilan uchrashuvda kelishildi.
Bundan tashqari “Rosatom” korporatsiyasi, elektroenergetika tizimini modernizatsiya qilish uchun Toshkentga mutaxassislarni yuborishi ma'lum qilingan.
Izoh (0)