Markaziy bank 2025-yil aprel oyida 6 ta tijorat bankini jarimaga tortdi. Bu haqda bank matbuot xizmati xabar berdi.
Markaziy bankning Bank nazorati qo‘mitasi tomonidan aprel oyidagi yig‘ilishlarida (8 marta) 45 ta masala ko‘rib chiqildi va tegishli qarorlar qabul qilingan. Shu bilan birga, kredit tashkilotlarining moliyaviy holatiga oid 19 ta masala — Markaziy bankning ko‘rsatmalari va prudensial me’yorlari talablarining bajarilishi, tijorat banklari va mikromoliya tashkilotlarida o‘tkazilgan inspeksiya natijalari ham muhokama qilingan.
To‘lov tizimi operatori va to‘lov tashkilotlari tomonidan ustav kapitalining eng kam miqdorini shakllantirilishi hamda tashkiliy-huquqiy shaklini aksiyadorlik jamiyatiga o‘zgartirilishi bo‘yicha qonunchilik talablariga rioya qilinmagani uchun 1 ta to‘lov tizimi operatori va 3 ta to‘lov tashkiloti chora hamda sanksiyalar qo‘llanilishi to‘g‘risida ogohlantirildi.
Markaziy bank tomonidan o‘tkazilgan o‘rganish va inspeksiya tekshiruvlari davomida aniqlangan qoidabuzarliklar hamda jismoniy shaxslarga bank hisobvaraqlari ochish va ularni ro‘yxatdan o‘tkazish bo‘yicha belgilangan talablar ta’minlanmagani uchun 6 ta bank, 3 ta lombard va 2 ta mikromoliya tashkilotiga nisbatan jarima sanksiyasi qo‘llanildi.
Markaziy bank 2025-yil yanvarida 10 ta bankni, fevralda 5 ta bankni jarimaga tortgandi.
Izoh (0)