“Bolalarga har qanday shaklda kuch ishlatish, jazolab tarbiyalash aslo mumkin emas” — Hilola Umarova

Bolalarga har qanday shaklda kuch ishlatish, ularni turli usullarda jazolab tarbiyalash aslo mumkin emas. Bu haqda maktabgacha va maktab ta’limi vaziri Hilola Umarova 6-mart kuni davlat va nodavlat maktabgacha ta’lim tizimi mas’ullari bilan uchrashuvda aytib o‘tdi.

Videokonferensiya shaklida tashkil etilgan muloqotda respublikadagi 38 mingdan ortiq maktabgacha ta’lim tashkilotlari rahbarlari ishtirok etdi.

Kunora ijtimoiy tarmoqlarda bog‘chalarda ayrim tarbiyachilar tomonidan bolajonlarga nisbatan ishlatilgan qo‘pollik, tarbiyasizlik holatlari aks etgan videolavha va turli xabarlar tarqatilmoqda.

“Bir haqiqatni yaxshi anglab olishimiz zarur: bolalarga har qanday shaklda kuch ishlatish, ularni turli usullarda jazolab tarbiyalash aslo mumkin emas. Buni tizimda ishlayotgan har bir rahbar, pedagog, tarbiyachi va yordamchi xodim birdek tushunishi, shu tartibga rioya etishlari shart”,  dedi bog‘cha rahbarlari e’tiborini ushbu salbiy holatlarga qaratgan vazir.

Qayd etilishicha, birgina o‘tgan yilning o‘zida ayni shu masalada vazirlikka yuzlab murojaatlar kelib tushgan. Natijada 32 nafar rahbar va tarbiyachi lavozimidan ozod etildi, 3 nafari javobgarlikka tortildi, 15 nafariga intizomiy chora ko‘rildi, 15 ta xususiy bog‘chaga berilgan litsenziya bekor qilingan.

“Taʼlim-tarbiya kuch ishlatishdan holi bo‘lishi lozim. Bolalarga nisbatan qo‘pollik qilgan yoki shafqatsizlarcha munosabatda bo‘lgan tarbiyachi, pedagogga qonun doirasida chora ko‘riladi. Uzr, ogohlantirishlar bilan qutilib qolish yo‘q”, dedi Hilola Umarova.

Uning ta’kidlashicha, bu o‘rinda MTT rahbariyatining shaxsiy javobgarligi ham kuchaytiriladi.

“Ta’lim davlat yoki xususiy sektorda bo‘lishi mumkin, lekin har qanday holatda ham bu bolalar bizning farzandlarimiz, shuni yodda saqlashingiz zarur. Bu siyosatni to‘g‘ri tushunmagan, bunga amal qilmagan har qanday xodim tizimdan butunlay chetlatiladi, har qanday tadbirkor bilan hamkorlikni to‘xtatishga majbur bo‘lamiz. Litsenziya talablariga hamda oilaviy bog‘chalarning bitimlariga bunday holatlar bo‘yicha qat’iy talablar kiritiladi”, dedi Hilola Umarova.

Maktabgacha va maktab ta’limi vaziri har bir bola o‘zini bog‘chasida erkin, xavfsiz va quvnoq his qilishini, unga barcha sharoitlar yaratilishini xohlashini ta’kidlab, har bir bola uchun bog‘chalarda “xavfsiz va qulay muhit” bo‘lishini talab qildi. Hilola Umarova barcha mas’ullarni o‘z ishiga yanada mas’uliyat va e’tibor bilan qarashga undadi.

So‘nggi oylarda bog‘chalarda bolalarga nisbatan qilingan qo‘pol munosabatlar

2025-yil 14-fevral kuni Samarqandning Jomboy tumanidagi bog‘chada tarbiyachi bolalarni urib, ularni haqoratlagani uchun jarimaga tortilib, ishdan ketgandi. 28-fevral kuni Toshkent viloyatining Parkent tumanidagi bog‘chada tarbiyachi bolalarning qulog‘idan tortib, yuz va bosh qismlariga bir necha marotaba urgani aniqlandi. 21-fevralda Toshkentdagi bog‘chada bola stulga skotchlab qo‘yilgani ortidan tarbiyachi va uning yordamchisi ishdan bo‘shatildi. 6-fevral kuni Sirdaryo viloyati Sardoba tumanidagi bog‘chada 6 yoshli bolaning tanasiga igna sanchib, tahdid qilingani aniqlandi. 6-yanvarda Toshkent viloyatidagi bog‘chada tarbiyachi bolalarning qulog‘idan tortib, bir necha marotaba urgani aniqlanib, ishdan olindi.