Sirdaryo viloyati Sardoba tumanidagi bog‘chada 6 yoshli bolaning tanasiga igna sanchib, tahdid qilindi. Holat yuzasidan “Bu Kun” dasturida maʼlumot berildi.
Xabar berilishicha, holat 10-fevral kuni Sirdaryo viloyati Sardoba tumanidagi bolalar bog‘chalaridan birida sodir bo‘lgan. Kasb-hunar maktabining amaliyotchi talabasi mazkur bog‘chaga amaliyot o‘tash uchun kelgan bo‘lgan.
Mazkur talaba bolalarga qarash vaqtida 6 yoshli bolaning tanasiga igna sanchgan. Ekspertiza xulosasiga ko‘ra, bolaga yengil tan jarohati yetkazilgan.
Bolaning onasi o‘sha kuni farzandining o‘rtoqlari onalariga telefon qilib, ulardan ham igna haqida so‘ragan. Taʼkidlanishicha, faqat uning o‘g‘liga igna sanchilgan bo‘lgan.
“O‘g‘lim aya, igna tiqdi, dedi. Birinchi, o‘rtoqlarimga tiqdi, menga tiqmadi, dedi. Keyin o‘rtoqlarining onalariga telefon qilib so‘radim, ularning farzandlariga igna sanchilmaganini aytishdi. Keyin o‘g‘limni videoga olib, xo‘jayinimga jo‘natdim. O‘g‘lim yig‘lab, qayerlariga igna sanchganini ko‘rsatib berdi”, deydi ona.
Holat yuzasidan amaliyotchi talaba qizga BHMning bir baravari (375 000 so‘m) miqdorida jarima jazosi tayinlandi.
Bog‘chalarda bolalar bilan bog‘liq shu kabi holatlar:
- Nukusdagi xususiy bog‘chada bolalarga qo‘pollik qilingani aniqlandi
- Sergelidagi bog‘chada tarbiyachining kaltaklashi oqibatida bolaning oyog‘i sindi
- Toshkentda 6 yoshli bolaga qizlar kiyimini kiydirib, ayollar raqsini ijro ettirgan bog‘cha tarbiyachisi ishdan bo‘shatildi
- Xorazmda tarbiyachi bolalarni qarg‘agan videosini adashib ota-onalar guruhiga jo‘natib yubordi
- Toshkentdagi xususiy bog‘chada tarbiyachi bolani urib, haqoratladi
- Surxondaryodagi bog‘chada 5 yoshli bolani urgan tarbiyachi ishdan olindi
- Jizzaxda 3 yoshli bog‘cha bolasining o‘limiga sababchi bo‘lganlarga sud hukmi o‘qildi
Bundan tashqari, Samarqandda bog‘chadagi bolalardan biri 3 yoshli qizning qo‘llaridan tishlab, jarohat yetkazgani, Andijondagi bog‘chada tarbiyachi bolaning yuziga bir necha bor tarsaki tushirgani to‘g‘risida xabar berilgandi.
Izoh (0)