Ijtimoiy tarmoqlarda Samarqand shahridagi 39-bog‘chada xodimlarning o‘zaro tortishuvi aks etgan video tarqalib, jamoatchilik e’tiborini tortdi.
Samarqand viloyati Maktabgacha va maktab ta’limi boshqarmasi axborot xizmatining rasmiy xabariga ko‘ra, videodagi holat 2024-yil sentyabr oyida yuz bergan. Aniqlanishicha, voqea mazkur muassasaning xo‘jalik ishlari mudiri hamda tarbiyachisi o‘rtasida kelib chiqqan shaxsiy tortishuv oqibatida yuzaga kelgan. Hodisa natijasida hech kim jarohat olmagan va jabrlanganlar qayd etilmagan.
Holatdan so‘ng 39-sonli davlat maktabgacha ta’lim tashkiloti xo‘jalik mudiri bilan tuzilgan mehnat shartnomasi bekor qilingan. Shuningdek, bog‘cha direktori hamda tortishuvda ishtirok etgan tarbiyachiga nisbatan amaldagi qonunchilik doirasida tegishli jazo choralari qo‘llanilgan.
Bog‘chalardagi voqealar
2025-yil 3-aprel kuni Samarqand viloyati Payariq tumanidagi bog‘chada bolalarga qo‘pol munosabatda bo‘lgan tarbiyachi ishdan olingani ma’lum qilindi. 27-mart kuni Toshkent viloyatidagi bog‘chada ham bolalarga qo‘pollik qilib kelgan tarbiyachi ishdan olingandi. 14-fevral kuni Samarqandning Jomboy tumanidagi bog‘chada tarbiyachi bolalarni urib, ularni haqoratlagani uchun jarimaga tortilib, ishdan ketgandi.
28-fevral kuni Toshkent viloyatining Parkent tumanidagi bog‘chada tarbiyachi bolalarning qulog‘idan tortib, yuz va bosh qismlariga bir necha marotaba urgani aniqlandi. 21-fevralda Toshkentdagi bog‘chada bola stulga skotchlab qo‘yilgani ortidan tarbiyachi va uning yordamchisi ishdan bo‘shatildi. 6-fevral kuni Sirdaryo viloyati Sardoba tumanidagi bog‘chada 6 yoshli bolaning tanasiga igna sanchib, tahdid qilingani aniqlandi.
6-yanvarda Toshkent viloyatidagi bog‘chada tarbiyachi bolalarning qulog‘idan tortib, bir necha marotaba urgani aniqlanib, ishdan olindi.
Izoh (0)