Xorazm viloyatining Yangiariq, Andijon viloyatining Ulug‘nor, Buxoro viloyatining Buxoro tumani va Toshkent viloyatining Bekobod shaharlarida gaz va elektrdan noqonuniy foydalanildi.
Maʼlum qilinishicha, Yangiariq tumani joylashgan “G‘.T.” MChJga qarashli metan zapravka tabiiy gazdan noqonuniy foydalanib kelgan. Xususan, shoxobchaning toraytiruvchi qurilma kamerasiga o‘rnatilgan plomba buzilgan.
Ushbu qoidabuzarlik natijasida gaz ta’minoti korxonasiga 505,8 mln so‘mlik zarar yetkazilgan.
Shuningdek, Ulug‘nor tumanida “I.E.” oilaviy nodavlat bog‘cha masʼul shaxslari tijorat maqsadida umumiy foydalanishdagi tabiiy gaz tarmog‘iga o‘zboshimchalik bilan ulanib, 226 mln so‘mlik tabiiy gazdan noqonuniy foydalangan.
Shu bilan birga, Buxoro tumanida fuqaro Sh.Q. o‘zining yashash xonadonida ishlab chiqarish sexi tashkil qilib, umumiy foydalanishdagi elektr tarmog‘iga tijorat maqsadida yashirin tarzda ulanib, jami 118,2 mln so‘mlik elektrdan noqonuniy foydalangan.
Bundan tashqari, Bekobod shahrida “O.-I.” MCHJ rahbari G‘.Z. “Maʼrifat” MFY hududidagi chiqindi to‘plash shoxobchasida tijorat maqsadida elektr tarmog‘iga o‘zboshimchalik bilan to‘g‘ridan-to‘g‘ri ulanib, 101,8 mln so‘mlik elektrdan noqonuniy foydalangan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Bunday holatlar soni ortib bormoqda
Samarqand viloyatidagi korxonalardan biri 553 million so‘mlik elektrdan noqonuniy foydalangani aniqlangandi. Shu bilan birga, Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi. Shuningdek:
- Buxoroda 1,2 mlrd so‘mlik elektrdan noqonuniy foydalanilgani aniqlandi.
- Qoraqalpog‘istonning uchta hududida 845 mln so‘mlik gazdan noqonuniy foydalanildi.
- Buxoro va Jizzaxda elektrdan noqonuniy foydalanganlar 360 mln so‘mdan ziyod zarar yetkazdi.
- Uchta viloyatda qariyb yarim mlrd so‘mlik gazdan noqonuniy foydalanildi.
Izoh (0)