Ижтимоий тармоқларда Олмалиқ шаҳридаги 6-сонли давлат мактабгача таълим муассасасида боланинг устига қайноқ сув тўкилгани айтилган видео тарқалди. Ҳолат юзасидан вилоят ММТБ маълумот берди.
Унга кўра муассасада 5 март куни соат кундузги 12:00 лар атрофида болалар қаровсиз қолиши натижасида бир нафар боланинг устига қайноқ сув тўкилган. Натижада болакайнинг бел соҳасида 3 даражали куйиш қайд этилган.
Маълум бўлишича, бола дастлаб тез тиббий ёрдамга олиб борилиб, тиббий текширувлардан ўтган. Шифохона расмийлари ҳолатни аниқлаб, 102 га мурожаат қилган. Бу вазиятда II томонидан ўрганиш олиб бориш учун ҳаракат олиб борилганда, боланинг онаси ҳеч кимга, кимга ҳеч қандай даъвоси йўқлигини таъкидлаганлиги сабабли томонлар келишуви билан иш ёпилган.
Аммо она мазкур муассасада бу каби нохуш ҳолатлар тугатилиш ўрнига авж олаётгани, болаларга муносабат жуда ёмон эканлигини кўриб, мазкур ҳолат ва бошқа вазиятлар бўйича 14 май куни ижтимоий тармоқларда чиқиш қилади.
Айни пайтда ушбу ҳолат Тошкент вилояти Мактабгача ва мактаб таълими бошқармаси томонидан назоратга олинган. Ишчи гуруҳ тузилиб, вазият тўлалигича ўрганиб чиқилди. Барча ҳужжатлар расмийлаштирилиб, ҳуқуқни муҳофаза қилувчи органларга топширилган.
Боғчалардаги воқеалар
2025 йил 3 апрель куни Самарқанд вилояти Пайариқ туманидаги боғчада болаларга қўпол муносабатда бўлган тарбиячи ишдан олингани маълум қилинди. 27 март куни Тошкент вилоятидаги боғчада ҳам болаларга қўполлик қилиб келган тарбиячи ишдан олинганди. 14 февраль куни Самарқанднинг Жомбой туманидаги боғчада тарбиячи болаларни уриб, уларни ҳақоратлагани учун жаримага тортилиб, ишдан кетганди.
28 февраль куни Тошкент вилоятининг Паркент туманидаги боғчада тарбиячи болаларнинг қулоғидан тортиб, юз ва бош қисмларига бир неча маротаба ургани аниқланди. 21 февралда Тошкентдаги боғчада бола стулга скотчлаб қўйилгани ортидан тарбиячи ва унинг ёрдамчиси ишдан бўшатилди. 6 февраль куни Сирдарё вилояти Сардоба туманидаги боғчада 6 ёшли боланинг танасига игна санчиб, таҳдид қилингани аниқланди.
6 январда Тошкент вилоятидаги боғчада тарбиячи болаларнинг қулоғидан тортиб, бир неча маротаба ургани аниқланиб, ишдан олинди.
Изоҳ (0)