14-mart kuni Maktabgacha va maktab ta’limi vazirligi tomonidan olis hududlardagi bolalarni maktabgacha ta’lim bilan qamrab olishga mo‘ljallangan “Aqlvoy” avtobuslarini Toshkent shahridan jo‘natish marosimi bo‘lib o‘tdi.
2021-yil 10-iyundagi PQ-5144 qarori ijrosini ta’minlash maqsadida maktabgacha ta’limning muqobil shakli sifatida 30 ta “Aqlvoy” avtobuslari qayta jihozlanib, respublikaning 11 ta hududiga yo‘l oldi. Bu orqali ta’lim xizmatlarini yetkazish qiyin bo‘lgan hududlarda 142 ta mobil guruh shakllantiriladi va qo‘shimcha 2528 nafar bola maktabgacha ta’lim bilan qamrab olinadi.
— “Aqlvoy” avtobuslari ichida o‘quv-metodik va didaktik materiallar, bolalar uchun turli o‘yin va o‘yinchoqlar to‘liq jihozlangan. Shuningdek, avtobuslar infratuzilmalar bilan ta’minlanib, konditsioner va biohojatxonalar o‘rnatilgan.
— Bu yil yuborilgan avtobuslar soni avvalgilariga nisbatan ko‘proq bo‘lib, 30 ta qayta jihozlangan avtobus va bolalarni maktabga tashish uchun yana bitta avtobus ajratildi.
Tashabbusning asosiy maqsadi – aholisi tarqoq joylashgan va maktabgacha ta’lim muassasalari qurish qiyin bo‘lgan hududlarda mobil maktabgacha ta’lim guruhlarini tashkil etishdir. O‘tgan yillarda yuborilgan avtobuslar ota-onalar tomonidan ijobiy baholandi”, deydi Maktabgacha va maktab ta’limi vazirligi Maktabgacha ta’lim tizimi faoliyatini muvofiqlashtirish departamenti direktor o‘rinbosari Berdiyeva Lola Alisherovna.
Mobil guruhlarda mashg‘ulotlar ikki smenada uch soatgacha davom etadi va barcha xizmatlar bepul taqdim etiladi. Bolalar avtobus ichida bo‘lgan vaqtda uning harakatlanishiga yo‘l qo‘yilmaydi.
“Aqlvoy” avtobuslarida sifatli ta’lim va o‘yin faoliyatini tashkil etish uchun 60 ta o‘yin maydonchasi jihozlangan. Bundan tashqari, mobil guruhlar yuqori malakali pedagog kadrlar bilan ta’minlanib, ularning malakasini oshirish bo‘yicha bepul qisqa muddatli o‘quv kurslari tashkil etiladi.
Izoh (0)