Toshkent viloyatidagi bog‘chada bolalarga qo‘pollik qilib kelgan tarbiyachi ishdan olindi. Bu haqda viloyat maktabgacha va maktab taʼlimi boshqarmasi xabar berdi.
Ijtimoiy tarmoqlarda Nazarbekdagi xususiy bog‘chalardan birida bolalar kaltaklanayotgani haqida xabarlar va bog‘cha tarbiyachisi bolalarga qo‘pollik qilayotgani aks etgan video tarqalgandi.
O‘rganishlar natijasida videodagi holat Zangiota tumanida joylashgan oilaviy maktabgacha ta’lim muassasasida sodir bo‘lgani aniqlandi. 27-mart kuni Zangiota tuman Maktabgacha va maktab ta’limi bo‘limi tomonidan ishchi guruh tuzilib, noxush holat kuzatilgan oilaviy maktabgacha ta’lim muassasasida o‘rganish ishlari olib borildi.
Ota-onalar muassasadan qaytgan farzandlari bilan muloqot davomida tarbiyachining zo‘ravonlik qilayotganini aniqlagan. Ushbu holatdan xabardor bo‘lgan ota-onalar 26-mart kuni muassasaga kelib, kuzatuv kameralaridagi yozuvlarni ko‘rib chiqishni talab qilgan. Kamera yozuvlari ko‘rilganda 25-mart kuni tashkilotda oktyabr oyidan buyon faoliyat yuritayotgan tarbiyachi R.G. tarbiyalanuvchilarga nisbatan qo‘pol munosabatda bo‘layotgani ma’lum bo‘lgan.
Muassasa rahbari mazkur vaziyatdan so‘ng tarbiyachi R.G. bilan mehnat shartnomasini bekor qilgan. Ota-onalarga bunday noxush holat takrorlanmasligi va ularning ishonchini suiiste’mol qilmaslik haqida munosabat bergan.
Maktabgacha va maktab ta’limi vaziri Hilola Umarova 6-mart kuni davlat va nodavlat maktabgacha ta’lim tizimi mas’ullari bilan uchrashuvda bolalarga har qanday shaklda kuch ishlatish, jazolab tarbiyalash aslo mumkin emasligini aytgandi. Buni tizimda ishlayotgan har bir rahbar, pedagog, tarbiyachi va yordamchi xodim birdek tushunishi, shu tartibga rioya etishlari shartligini ta’kidlagandi.
Taʼlim-tarbiya kuch ishlatishdan holi bo‘lishi lozim. Bolalarga nisbatan qo‘pollik qilgan yoki shafqatsizlarcha munosabatda bo‘lgan tarbiyachi, pedagogga qonun doirasida chora ko‘riladi. Uzr, ogohlantirishlar bilan qutilib qolish yo‘q, degan edi Hilola Umarova.
So‘nggi oylarda bog‘chalarda bolalarga nisbatan qilingan qo‘pol munosabatlar
2025-yil 14-fevral kuni Samarqandning Jomboy tumanidagi bog‘chada tarbiyachi bolalarni urib, ularni haqoratlagani uchun jarimaga tortilib, ishdan ketgandi. 28-fevral kuni Toshkent viloyatining Parkent tumanidagi bog‘chada tarbiyachi bolalarning qulog‘idan tortib, yuz va bosh qismlariga bir necha marotaba urgani aniqlandi. 21-fevralda Toshkentdagi bog‘chada bola stulga skotchlab qo‘yilgani ortidan tarbiyachi va uning yordamchisi ishdan bo‘shatildi. 6-fevral kuni Sirdaryo viloyati Sardoba tumanidagi bog‘chada 6 yoshli bolaning tanasiga igna sanchib, tahdid qilingani aniqlandi. 6-yanvarda Toshkent viloyatidagi bog‘chada tarbiyachi bolalarning qulog‘idan tortib, bir necha marotaba urgani aniqlanib, ishdan olindi.
Izoh (0)