Qashqadaryo viloyatidagi davlat maktabgacha ta’lim tashkilotida tarbiyachi bolaning boshiga qaynoq suv to‘kib yubordi. Holat yuzasidan viloyat Maktabgacha va maktab ta’limi boshqarmasi ma’lumot berdi.
Unga ko‘ra, holat Qashqadaryo viloyati Maktabgacha va maktab ta’limi boshqarmasi nazoratiga olingan bo‘lib, o‘rnatilgan tartib asosida o‘rganilmoqda. Voqea 6-fevral kuni G‘uzor tuman 4-DMTT katta guruh tarbiyalanuvchisi hamda DMTTda faoliyat yurituvchi Sh.Y. (tarbiyachi), D.X.(tarbiyachi) e’tiborsizligi oqibatida sodir bo‘lgan.
Ma’lum bo‘lishicha, shu kuni soat 12:00 lar atrofida tarbiyalanuvchilar tashqaridan ichkariga tushlik vaqtiga olib kirilayotganda Sh.Y. hamda tarbiyalanuvchi to‘qnashib ketgan. Oqibatda qaynagan suv uning peshona chap yonoq sohasi qismiga to‘kilgan.
Mazkur holat davomida bog‘cha hamshirasi tomonidan zudlik bilan birinchi tez tibbiy yordam ko‘rsatilgan. Shundan so‘ng tarbiyalanuvchining otasi chaqirtirilib, xodimlar ishtirokida G‘uzor tuman shoshilinch tez tibbiyot birlashmasiga olib borilib, zaruriy choralar ko‘rilgan.
Bundan tashqari, tibbiyot birlashmasi kuzatuv va tekshiruv o‘tkazgandan so‘ng, tarbiyalanuvchi va otasi tibbiyot birlashmasidan ketib qolgani keltirib o‘tilgan. Bolaning tibbiy ko‘riklardan o‘tkazilishi, sog‘lig‘ini tez tiklashi uchun mas’ullar tomonidan ham moliyaviy yordam ko‘rsatilgan.
Hozirda o‘z vazifasiga sovuqqonlik bilan qaragan ta’lim tashkiloti mas’ul xodimlariga chora qo‘llanishi yuzasidan yetarli hujjatlar to‘planib, xizmat tekshiruvi o‘tkazilmoqda.
Bundan tashqari, mazkur holat yuzasidan G‘uzor tuman prokuraturasi tomonidan ham o‘rnatilgan tartib asosida o‘rganish ishlari amalga oshirilmoqda. O‘rganishlar yakuniga doir qo‘shimcha axborot beriladi.
Maktabgacha va maktab ta’limi vaziri Hilola Umarova 6-mart kuni davlat va nodavlat maktabgacha ta’lim tizimi mas’ullari bilan uchrashuvda bolalarga har qanday shaklda kuch ishlatish, jazolab tarbiyalash aslo mumkin emasligini aytgandi. Buni tizimda ishlayotgan har bir rahbar, pedagog, tarbiyachi va yordamchi xodim birdek tushunishi, shu tartibga rioya etishi shartligini ta’kidlagandi.
So‘nggi oylarda bog‘chalarda bolalarga nisbatan qilingan qo‘pol munosabatlar
2025-yil 3-aprel kuni Samarqand viloyati Payariq tumanidagi bog‘chada bolalarga qo‘pol munosabatda bo‘lgan tarbiyachi ishdan olingani ma’lum qilindi. 27-mart kuni Toshkent viloyatidagi bog‘chada ham bolalarga qo‘pollik qilib kelgan tarbiyachi ishdan olingandi. 14-fevral kuni Samarqandning Jomboy tumanidagi bog‘chada tarbiyachi bolalarni urib, ularni haqoratlagani uchun jarimaga tortilib, ishdan ketgandi. 28-fevral kuni Toshkent viloyatining Parkent tumanidagi bog‘chada tarbiyachi bolalarning qulog‘idan tortib, yuz va bosh qismlariga bir necha marotaba urgani aniqlandi. 21-fevralda Toshkentdagi bog‘chada bola stulga skotchlab qo‘yilgani ortidan tarbiyachi va uning yordamchisi ishdan bo‘shatildi. 6-fevral kuni Sirdaryo viloyati Sardoba tumanidagi bog‘chada 6 yoshli bolaning tanasiga igna sanchib, tahdid qilingani aniqlandi. 6-yanvarda Toshkent viloyatidagi bog‘chada tarbiyachi bolalarning qulog‘idan tortib, bir necha marotaba urgani aniqlanib, ishdan olindi.
Izoh (0)