O‘zbekistonda joriy yilning bahorgi mavsumida 130 mln tupdan ortiq daraxt va buta ko‘chatlari o‘tqazildi. Bu haqda Ekologiya vazirligi xabar berdi.
Qayd etilishicha, O‘zbekistonda ekologik barqarorlikni ta’minlash, aholi uchun qulay yashash muhitini shakllantirish maqsadida “Yashil makon” umummilliy loyihasi doirasida ko‘kalamzorlashtirish ishlari olib borilmoqda.
Xususan, 2025-yilning bahorgi mavsumida mamlakat bo‘ylab jami 136 million tup daraxt va buta ko‘chatlari ekildi. Bu boradagi ishlar davlat rahbari tomonidan 2021-yilda ilgari surilgan “Yashil makon” loyihasi asosida tizimli ravishda amalga oshirilmoqda. Loyiha doirasida keyingi besh yilda har yili 200 million tupdan daraxt va buta ko‘chatlari hamda qalamchalarini ekish, respublika hududlaridagi yashillik darajasini 30 foizga yetkazish maqsad qilib olingan.
Ekologiya vazirligi huzuridagi O‘rmon va muhofaza etiladigan tabiiy hududlarni rivojlantirish hamda cho‘llanishga qarshi kurashish boshqarmasi ma’lumotlariga ko‘ra, 2021-yil kuz mavsumida 86 million, 2022-yilda 203 million, 2023-yilda 220 million, 2024-yilda esa 227 million tup daraxt va butalar ekilgan. Umumiy hisobda so‘nggi to‘rt yilda respublika miqyosida 872 million tup daraxt va buta ko‘chatlari hamda qalamchalari o‘tqazilgan.
Shuningdek, Orolbo‘yi mintaqasida cho‘llanishga qarshi kurashish maqsadida amalga oshirilayotgan ishlar doirasida hozirgi kunga qadar 2 million gektar maydonda yashil qoplama yaratilgan. Kelgusida Orol dengizi tubida yana 100 ming gektar maydonda “yashil maydon” barpo etilishi, Orolbo‘yi mintaqasidagi o‘rmonzorlar umumiy maydonining esa 2,1 million gektarga yetkazilishi rejalashtirilgan.
2025-yilda “Yashil makon” va “Mening bog‘im” loyihalari doirasida yana 200 million tup daraxt va butalar ekilishi ko‘zda tutilgan.
Mutaxassis-olimlarning qayd etishicha, cho‘l hududlarida 1 gektar saksovulzor bir yilda o‘rtacha 1158 kg karbonat angidridni yutib, tabiatga shuncha miqdorda kislorod chiqaradi. Shuningdek, bitta saksovul daraxti yil davomida 3 tonnagacha qum va changni ushlab qolish xususiyatiga ega. Tog‘li hududlarda esa bir tup archa daraxti inson salomatligi uchun muhim bo‘lgan 30 kilogrammgacha fitonsid moddalarini ishlab chiqaradi.
Ko‘rilayotgan choralar O‘zbekistonning ekologik barqarorligini ta’minlash, iqlim o‘zgarishlariga moslashish hamda sog‘lom turmush tarzini targ‘ib qilishga qaratilgan sa’y-harakatlarning amaliy ifodasi hisoblanadi.
Sentyabr oyida Buxoro viloyati Jondor tumanida saksovul butalarini sindirgan fuqaroga jarima qo‘llangan edi. Fuqaroga nisbatan 9 452 000 so‘m jarima hamda tabiatga yetkazilgan zarar qo‘llangandi.
Shuningdek, Buxoro viloyatida sentyabr—oktyabr oylari davomida saksovul bilan bog‘liq 25 ta huquqbuzarlik aniqlangani haqida xabar berilgandi.
Mazkur davrda 25 ta holatda tabiatga 29 million 702 ming 400 so‘m zarar yetkazilgani hisoblangan va 222 million 900 ming so‘m jarima tayinlangan. Huquqbuzarlar jami 252 million 602 ming 400 so‘m tovon to‘lashlari belgilangan. Buxorodagi cho‘llardan saksovul sindirib olib ketayotgan shaxslarga qariyb 40 mln so‘m jarima belgilangandi.
Yillar kesimida kesilgan daraxtlar statistikasi
2022-yilda qimmatbaho daraxtlarning noqonuniy kesilish holatlari 1669 tani tashkil qilib, 2021-yilga nisbatan 2513 taga yoki 61 foizga kamaygan. 2023-yilda esa qimmatbaho daraxtlarning noqonuniy kesilish holatlari 1097 taga yetib, 2022-yilga nisbatan 572 taga yoki 35 foizga qisqargan. 2024-yilga kelib qimmatbaho daraxtlarni noqonuniy kesish holatlari 1098 tani tashkil qilgan.
Izoh (0)