Buxoro viloyatida saksovul o‘simliklari savdosi bilan shug‘ullanuvchi huquqbuzarlar aniqlandi, deb xabar bermoqda viloyat Ekologiya boshqarmasi.
Unda aytilishicha, Romitan tuman bo‘limi inspektorlari hamda tuman Ichki ishlar bo‘limi tomonidan Uchqur cho‘l hududida navbatdagi reyd tadbiri o‘tkazildi. Tadbir davomida Peshku tumanida yashovchi fuqaro Sh.I. cho‘l hududidan tabiiy holatda o‘sgan saksovul o‘simliklarini noqonuniy tarzda sindirib, olib ketayotgani aniqlandi.
Holat yuzasidan huquqbuzar fuqaroga nisbatan Ma’muriy javobgarlik to‘g‘risidagi kodeksning 79-modda 1-qismiga asosan ma’muriy bayonnoma rasmiylashtirilib, 9 375 000 so‘m jarima hamda tabiatga yetkazilgan zarar uchun 26 250 000 so‘m qo‘llanildi.
Ma’lumot uchun: Saksovul-cho‘lda o‘suvchi daraxt ko‘rinishidagi o‘simlik. Saksovullarning asosiy xususiyati — sahro tuprog‘ini shamollardan pana qilib, eroziya tarqalishini oldini oladi. Bu esa hududlar cho‘llashuvini oldini oladi hamda sahro ekosistemasini saqlanib qolishini ta’minlaydi. Saksovulning tanasi burama shaklga ega bo‘lib, yuzasi silliq bo‘ladi. Daraxtning shox-shabbalari qalin va yashil tusda. O‘simlik gullaganda pushti va malina rangli gulchalar paydo bo‘ladi. Ko‘rinishidan omonatgina ko‘rinsa ham, kuchli tomir tizimi evaziga saksovullar cho‘l va toshli yerlarga mustahkam o‘rnashadi.
Buxorodagi saksovul o‘g‘rilari
Sentyabr oyida Buxoro viloyati Jondor tumanida saksovul butalarini sindirgan fuqaroga jarima qo‘llanilgan edi. Fuqaroga nisbatan 9 452 000 so‘m jarima hamda tabiatga yetkazilgan zarar qo‘llanilgandi.
Shuningdek, Buxoro viloyatida sentyabr-oktyabr oylari davomida saksovul bilan bog‘liq 25 ta huquqbuzarlik aniqlangani haqida xabar berilgandi.
Mazkur davrda 25 ta holatda tabiatga 29 million 702 ming 400 so‘m zarar yetkazilgani hisoblangan va 222 million 900 ming so‘m jarima tayinlangan. Huquqbuzarlar jami 252 million 602 ming 400 so‘m tovon to‘lashlari belgilangan.
Avvalroq, Buxorodagi cho‘llardan saksovul sindirib olib ketayotgan shaxslarga qariyb 40 mln so‘m jarima belgilangandi.
Izoh (0)