Toshkentda 26-fevralga o‘tar kechasi qor yog‘ganidan so‘ng poytaxtning qator hududlarida daraxtlar quladi. Oqibatda avtomobil va simyog‘ochlarga zarar yetdi.
Ijtimoiy tarmoqlarda qor og‘irligidan daraxtlar qulashiga ularning noto‘g‘ri, “palma” qilib kesilgani sabab qilib ko‘rsatildi. Poytaxt hokimligi bunga munosabat bildirib, daraxtlar va ularning shoxlari qulab tushishiga bir nechta omillar sabab bo‘lganini izohladi.
Unga ko‘ra:
- kuchli yomg‘ir daraxt shoxlarining ivib, shishishiga va yog‘och tuzilmasining zaiflashishiga olib keldi;
- yomg‘irdan so‘ng haroratning 2 daraja sovuqqacha keskin pasayishi shoxlarni mo‘rt qilib qo‘ydi;
- daraxtlardagi muz va qor ularning og‘irligini oshirdi, bu esa shoxlarning sinishi va shikastlanishiga sabab bo‘ldi.
Hokimlik xabarida qayd etilishicha, shahardagi barcha daraxtlar Ekologiya vazirligi reyestrida hisobga olingan va shahar ekologiya boshqarmasi nazorati ostida.
Daraxtlarga nisbatan palma atamasi qo‘llanishi noto‘g‘ri, chunki shahardagi qulab tushgan daraxtlarning birortasi ham bu tushunchaga mos kelmaydi. Shox-shabbalarni kesish qat’iy tasdiqlangan qoidalarga muvofiq amalga oshiriladi va daraxtlarning umrini uzaytiradi, deyiladi munosabatda.
Poytaxt hokimligi kommunal xizmatlar oqibatlarini tezkor bartaraf etayotganini bildirib, piyodalar va haydovchilarni ehtiyotkor bo‘lishga chaqirdi.
“O‘zgidromet” qator hududlarda, shu jumladan, 26-fevral kuni qor yog‘ishini prognoz qilgandi.
Izoh (0)