Dunyo bo‘ylab sayohat qilishni xohlaganlar uchun mehmonxona tanlash faqatgina qulaylik emas, balki o‘ziga xos tajriba ham bo‘lishi mumkin. Agar oddiy, an’anaviy joylardan tashqari noodatiy tajribalar izlayotgan bo‘lsangiz, unda dunyoning eng g‘aroyib mehmonxonalari sizni kutmoqda. Ushbu maqolada eng noodatiy va hayratga soluvchi mehmonxonalarga virtual sayohat qilamiz.
Aurora Village
Mazkur joy Murmansk shahridan taxminan 50 kilometr uzoqlikda, Arktika okeani yo‘lida joylashgan noyob mehmonxona kompleksidir. U o‘zining iglu shaklidagi shinam va zamonaviy uylar bilan mashhur, mehmonlar bu yerda shimol yog‘dusini to‘g‘ridan to‘g‘ri o‘z yotoqlaridan tomosha qilish imkonini beradi.
LeapRus Capsule Hotel
LeapRus kapsula mehmonxonasi Rossiyaning Kavkaz tog‘larida, Elbrus tog‘ining 3912 metr balandlikda joylashgan noyob ekologik mehmonxonadir. U 2013-yilda italiyalik arxitektorlar tomonidan ekstremal sharoitlarda yashash uchun mo‘ljallangan modullardan qurilgan.
Museum Hotel
Turkiyaning Kappadokiya hududida joylashgan Museum Hotel o‘zining noyob va “jonli muzey” konsepsiyasi bilan mashhur. Mehmonxona tashrif buyuruvchilarga tarix va hashamatni birlashtirgan o‘ziga xos tajriba taqdim etadi.
Museum Hotel’da har biri o‘ziga xos va noyob bo‘lgan 30 ta xona va lyuks xonalar mavjud. Har bir xona qadimiy antikvar buyumlar bilan bezatilgan. Mehmonxonaning tepasidan Kappadokiyaning go‘zal manzaralarini 180° burchak ostida tomosha qilish mumkin.
Crazy House
Vyetnamning Dalat shahrida joylashgan Crazy House (rasmiy nomi: Hằng Nga) mehmonxonasi o‘zining noodatiy va ijodiy arxitekturasi bilan mashhur. Bino 1990-yilda vyetnamlik arxitektor Dang Viyet tomonidan qurilgan bo‘lib, u o‘zining dizaynida Antoni Gaudi va Salvador Dali kabi sanʼatkorlarning ishlaridan ilhomlangan.
Mehmonxona meʼmoriy jihatdan turli shakllar: turli hayvonlar, qo‘ziqorinlar va g‘or shaklidagi elementlarni o‘z ichiga oladi. Bino tashqi ko‘rinishidan ulkan bir daraxtga o‘xshaydi. U yerdagi har bir xona turli hayvonlar mavzusiga bag‘ishlangan. Misol uchun, Tiger Room’da yirtqich mushuksimonlar oilasi shaklidagi elementlar mavjud bo‘lsa, Eagle Room’da burgut mavzusi aks ettirilgan.
Atlantis, The Palm
U Dubayning eng mashhur mehmonxonalari sirasiga kiradi. Palm Jumeirah orolida joylashgan mehmonxona 1544 xonadan iborat bo‘lib, u yerda mehmonlar uchun keng va zamonaviy xonalar, lyuks joylar va boshqa qulayliklar taqdim etiladi.
Mehmonxona 35 ta restoran va kafega ega, bu yerda mehmonlar dunyoning turli burchaklaridan taomlarni tatib ko‘rishlari mumkin. Atlantis, The Palm’da Aquaventure Waterpark suv parki bo‘lib, u yerga bepul kirish imkoniyati mavjud. Bu dunyoning eng katta suv parklaridan biri hisoblanadi. Shuningdek, The Lost Chambers Aquarium’da suv osti dunyosini o‘rganish va xususiy plyajda vaqt o‘tkazish mumkin.
Azulik Tulum
Azulik Tulum — Meksikaning Tulum shahrida joylashgan, ekologik toza mehmonxona. U Karib dengizi sohilida, Mayan o‘rmonining bag‘rida joylashgan bo‘lib, mehmonlarga tabiat bilan uyg‘unlashgan holda dam olish imkonini taqdim etadi.
Azulikda 48 ta yog‘ochdan yasalgan villalar mavjud bo‘lib, xonalar zamonaviy qulayliklarga ega. Biroq xonalar televizor, telefon yoki elektr ta’minotiga ega emas, bu esa mehmonlarga tabiat bilan yanada yaqinroq bo‘lish imkonini beradi. Kurort hududida uchta restoran xizmat ko‘rsatadi.
Huilo Huilo Montaña Magica
Huilo Huilo Montaña Magica — Chilining janubidagi Los Rios mintaqasida, Panguipulli shahridan taxminan 55 km uzoqlikda joylashgan, o‘ziga xos arxitekturaga ega ekologik mehmonxona. U Huilo biologik rezervatsiyasining markazida, And tog‘larining janubiy qismidadir.
Montaña Magica mehmonxonasi kichik vulqon shaklida qurilgan bo‘lib, tepasidan doimiy ravishda sharshara oqib tushadi. Mehmonxona atrofidagi o‘rmon bilan uyg‘unlashgan holda qurilgan, ichki makonida mahalliy hunarmandlar tomonidan ishlangan yog‘och va toshdan foydalanilgan.
Hotel Palacio de Sal
Hotel Palacio de Sal dunyoning eng katta tuz tekisliklaridan biri bo‘lgan Salar de Uyuni yaqinida joylashgan, tuzdan qurilgan yagona mehmonxona. U mehmonxona o‘zining noyob arxitekturasi va qulayliklari bilan ajralib turadi.
Hotel Palacio de Sal Boliviyaning janubida, Uyuni shahridan 25 km sharqda, Salar de Uyuni tuz tekisligining sharqiy qirg‘og‘ida joylashgan. Mehmonxona butunlay tuz bloklaridan qurilgan bo‘lib, devorlar, pol, shift va mebellar (karavotlar, stollar, stullar va haykallar) hamda mehmonxonaning tashqi ko‘rinishi tuzdan yasalgan.
Izoh (0)