“Yashil makon” loyihasi doirasida ikki milliondan ortiq ekilmagan ko‘chatlarni hisobotga “ekildi” deb qo‘shib yozilgan, sug‘orib bo‘lmaydigan joylarga 7,3 million tup nihol o‘tqazilgan, ekilgan 1,8 million tup ko‘chatni saqlash va parvarishlash uchun tegishli masʼullar belgilanmagan. Bu haqda Oliy Majlis Qonunchilik palatasining navbatdagi yig‘ilishida Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov maʼlum qildi.
Aziz Abduhakimovning aytishicha, ko‘chatlar ekilganining haqqoniyligi tekshirilganda ayrim rahbarlar tomonidan bir qator xato va kamchiliklarga yo‘l qo‘yilgani aniqlangan.
“Monitoring davomida ekilmagan ko‘chatlarni ekildi deb hisobotga qo‘shib yozish holatlarini aniqladik. Maʼlumot uchun, Navoiy viloyatida 959 ming, Toshkent viloyatida 564 ming, Farg‘ona viloyatida 465 ming, Qashqadaryo viloyatida 227 ming tup ekilmagan daraxt ko‘chatlari hisobotga ‘ekildi’ deb qo‘shib yozilgani aniqlandi. Shu bilan birga, 1,8 million tup ko‘chatni saqlash va parvarishlash uchun tegishli masʼullar umuman belgilanmagani oshkor bo‘ldi. Eng achinarli ahvol – Farg‘ona viloyatida. U yerda 415 ming tup daraxtga umuman, hech qanday masʼul belgilanmagan. Toshkent viloyatida 355 mingta, Surxondaryoda 331 mingta, Buxoroda 136 mingta, Qoraqalpog‘istonda 136 mingta ekilgan daraxtlar eʼtiborsiz qoldirilgan”, — dedi vazir.
Aziz Abduhakimovning qo‘shimcha qilishicha, sug‘orish tizimlari mavjud bo‘lmagan hududlarga 7,3 million tup ko‘chatlar ekilgani ham aniqlangan.
“Bu shuncha ko‘chat parvarishlab, daraxtga aylantirish imkoniyati bo‘lmagan joylarga ekilgan degani. Jumladan, Navoiy viloyatida 3 million tup, Toshkent viloyatida 2 millionta, Surxondaryoda 404 mingta, Xorazmda 338 mingta, Qashqadaryoda 336 ming tup daraxtlar sug‘orish tizimi bo‘lmagan joylarga ekilgan”, — dedi u.
Vazirga ko‘ra, hududlarning tuproq-iqlim sharoitidan kelib chiqib daraxt va butalarning mos turlarini tanlanmay ekish holatlari ham aniqlangan.
“Masalan, janubiy hududlarda o‘suvchi butalarni shimoliy hududlarga, yoki aksincha, shimolda o‘suvchi o‘simliklarni janubda ekilishiga yo‘l qo‘yilgan. Xususan, 2022-yilda Toshkent—Samarqand—Buxoro yo‘nalishining Sirdaryo viloyatidan o‘tuvchi M–39 avtoyo‘li bilan temiryo‘l oralig‘ida 3 ming 530 tup daraxt ko‘chatlari ekilgan. Shundan 3 ming 210 ta tupi ‘Eldor’ qarag‘ayi, yaʼni ‘Sasna’ daraxti va 520 tup terak ko‘chatlari qurib qolgan. Ekilgan ko‘chatlarni sug‘orish va parvarishlash yuzasidan masʼullarga 10 ming 961 ta majburiy ko‘rsatmalar berilib, talablarni bajarmagan 753 nafar huquqbuzarga nisbatan 1 milliard 156 million so‘m maʼmuriy jarimalar qo‘llangan”, — dedi Aziz Abduhakimov.
Maʼlumot uchun, bugungi kunda O‘zbekistondagi yashil maydonlar 6 million 673 ming gektarni tashkil etadi. “Yashil makon” umummilliy loyihasi doirasida har yili kamida 200 million tup daraxt ekish belgilangani nazarda tutilgan. O‘tgan 2021-yilda respublikada 85 million tup, 2022-yilda jami 202,7 million tup daraxt ko‘chatlari ekilgan. Joriy yilning bahorgi mavsumida hududlarga 127,7 million tup daraxt o‘tqazilgan.
Izoh (0)