Buxoro viloyati Jondor tumanida saksovul butalarini sindirgan fuqaroga jarima qo‘llanildi. Bu haqda viloyat Ekologiya boshqarmasi xabar berdi.
![](/static/2024/09/05/gh-mY1pNrgX.jpg)
Ma’lum qilinishicha, Jondor tuman inspeksiyasi inspektorlari tomonidan cho‘l hududlarida navbatdagi reyd tadbiri o‘tkazildi. Tadbir davomida Jondor tumani “Qozikenti” MFYda yashovchi fuqaro Y.N. tuman o‘rmon fondi yerlaridan tabiiy holatda o‘sgan saksovul o‘simliklarini noqonuniy tarzda sindirib, olib ketayotgani aniqlandi.
Holat yuzasidan huquqbuzar fuqaroga nisbatan Ma’muriy javobgarlik to‘g‘risidagi kodeksning 79-modda 1-qismiga asosan 9 452 000 so‘m jarima hamda tabiatga yetkazilgan zarar qo‘llanildi.
Jondor tuman bo‘limi tomonidan avgust oyida o‘tkazilgan reyd tadbirlari davomida 31 ta huquqbuzarlik holati aniqlanib, 24 140 000 so‘m jarima hamda tabiatga zarar hisoblandi.
Bundan avval Surxondaryoda bitta daraxt kesgani uchun fuqaroga 10 tup daraxt ekib, uni parvarish qilish majburiyati yuklatilgan edi. Shuningdek, Samarqandda bir tup terak kesgan fuqaro 8,5 mln so‘m jarimaga tortilgandi.
Izoh (0)