Samarqand viloyatida chorva mollari ko‘chatlarni shikastlantirgani uchun ikki kishi 10,5 mln so‘m to‘laydigan bo‘ldi. Bu haqda viloyat Ekologiya boshqarmasi xabar berdi.
Ma’lum qilinishicha, Kattaqo‘rg‘on tumani Ekologiya, atrof-muhitni muhofaza qilish bo‘limi davlat inspektorlari tomonidan tumanning “Alijon” va “Melixo‘ja” mahallasi hududida kuzatuv reyd tadbiri olib borilgan.
Unda Juma—Kattaqo‘rg‘on yo‘l yoniga yashil belbog‘ shaklida ekilgan manzarali daraxtlar atrofiga ushbu mahallalarda yashovchi fuqarolar A.N. va J.B. chorva mollarni o‘tlatishi natijasida bir necha tub manzarali daraxt ko‘chati shikastlangani aniqlangan.
Shu boisdan huquqbuzarlarning har biriga Ma’muriy javobgarlik to‘g‘risidagi kodeksning tegishli moddalariga binoan bayonnomalar tuzilib, BHMning yigirma besh barobari — 9 375 000 so‘m miqdorida jarima va 1 125 000 so‘m miqdorida o‘simlik dunyosiga yetkazilgan zarar hisoblandi.
Sentyabr oyida Buxoro viloyati Jondor tumanida saksovul butalarini sindirgan fuqaroga jarima qo‘llangan edi. Fuqaroga nisbatan 9 452 000 so‘m jarima hamda tabiatga yetkazilgan zarar qo‘llangandi.
Shuningdek, Buxoro viloyatida sentyabr—oktyabr oylari davomida saksovul bilan bog‘liq 25 ta huquqbuzarlik aniqlangani haqida xabar berilgandi.
Mazkur davrda 25 ta holatda tabiatga 29 million 702 ming 400 so‘m zarar yetkazilgani hisoblangan va 222 million 900 ming so‘m jarima tayinlangan. Huquqbuzarlar jami 252 million 602 ming 400 so‘m tovon to‘lashlari belgilangan. Buxorodagi cho‘llardan saksovul sindirib olib ketayotgan shaxslarga qariyb 40 mln so‘m jarima belgilangandi.
Yillar kesimida statistika
2022-yilda qimmatbaho daraxtlarning noqonuniy kesilish holatlari 1669 tani tashkil qilib, 2021-yilga nisbatan 2513 taga yoki 61 foizga kamaygan. 2023-yilda esa qimmatbaho daraxtlarning noqonuniy kesilish holatlari 1097 taga yetib, 2022-yilga nisbatan 572 taga yoki 35 foizga qisqargan. 2024-yilga kelib qimmatbaho daraxtlarni noqonuniy kesish holatlari 1098 tani tashkil qilgan.
Izoh (0)