O‘zbekistonda qish yaqinlashishi bilan saksovul kesish holatlari ko‘payadi. Jumladan, Buxoro viloyatida sentyabr—oktyabr oylari davomida saksovul bilan bog‘liq 25 ta huquqbuzarlik aniqlangan. Bu haqda Ekologiya, atrof-muhitni muhofaza qilish va iqlim o‘zgarishi vazirligi axborot xizmati xabar bermoqda.
Aytilishicha, o‘tkazilgan reydlar davomida jami 25 ta huquqbuzarlik aniqlangan.
Huquqbuzarlarga nisbatan Ma’muriy javobgarlik to‘g‘risidagi kodeksning 79-moddasi (daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlash, yo‘q qilish yoki boshqa joyga ko‘chirib o‘tkazish) 1-qismi bilan ma’muriy bayonnoma rasmiylashtirilgan.
O‘tgan vaqt mobaynida 25 ta holatda tabiatga 29 million 702 ming 400 so‘m zarar yetkazilgani hisoblangan va 222 million 900 ming so‘m jarima tayinlangan. Huquqbuzarlar jami 252 million 602 ming 400 so‘m tovon to‘lashlari belgilangan.
Qonunchilikka ko‘ra, daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish fuqarolarga BHMning yigirma besh baravaridan (9 million 375 ming so‘m) ellik baravarigacha (18 million 750 ming so‘m), mansabdor shaxslarga esa — ellik baravaridan (18 million 750 ming so‘m) yetmish besh baravarigacha (28 million 125 ming so‘m) miqdorda jarima solishga sabab bo‘ladi.
Izoh (0)