Rossiyaning Gubkin nomidagi neft va gaz universitetining Toshkentdagi filialida talabalarga urush va “Rossiyaning jasur jangchilari” haqida ma’ruzalar o‘tilmoqda. Universitetda tahsil oluvchi Muhidjon bu haqda ma’lumot berdi. Uning xati Meduza nashrining “Urush o‘quvchilar nigohida” ruknida e’lon qilindi.
Men Gubkin universitetining Toshkent filiali talabasiman. Ochig‘ini aytsam, urush boshlanganida dahshatga tushgan edim. Doim Lenin va “buyuk rus shovinizmi” haqida gapirishardi, men buni mubolag‘a deb o‘ylardim, lekin endi bu haqiqat ekanini tushundim. Oilamning Ukraina haqida eng iliq xotiralari bor, buvim va bobom yoshliklari Yalta va Odessada qanday o‘tganini aytib bergan. Buvim bombardimonlar aks etgan videolarni ko‘rib, yig‘lab yubordi.
Biz, O‘zbekiston fuqarolarining yosh avlodiga ham, urush ta’sir qildi. Endi har hafta universitetda bizga ma’ruzalar o‘qishadi, ularda katta avlod vakili bizga urush va Rossiyaning jasur qo‘shinlari haqida so‘zlab berishadi. Men hali ham din ishlari bo‘yicha markaz xodimining so‘zlarini eslayman: “Men qadimiy pravoslav rus madaniyatining vakili sifatida Rossiya qo‘shinlari satanistlarga qarshi kurashayotganini ta’kidlayman”. Bu — safsata, bu — bema’nilik. Ukrainadagi urushga biz — mustaqil O‘zbekiston yoshlarining qanday aloqamiz bor?, deb yozgan Muhidjon.
Talaba u va do‘stlari Ukrainani faol qo‘llab-quvvatlashini ma’lum qildi. Muhidjon sog‘lom fikrli har bir shaxs urushga qarshi ekanini ta’kidladi.
Biz hammamiz bu jinoiy, axloqqa zid urushga qarshimiz. Sog‘lom fikrli odamlar har doim har qanday urush va zo‘ravonlikka qarshi. Men Ukraina o‘z ozodligi va mustaqilligini himoya qilishiga chin dildan ishonaman. Biz illyuziyalardan yiroqmiz, agar Ukraina mag‘lubiyatga uchrasa, ozodlik va mustaqillikni qo‘limizda qurol bilan himoya qilishimizga to‘g‘ri kelishini juda yaxshi bilamiz, deya xulosa qildi u.
Izoh (1)
ha, ichimizdagi do'st ko'ringan dushmanlar bizni botqoqlikka, yoshlarimizni qullikka yetaklayveradi