O‘zbekiston tashqi ishlar vaziri Baxtiyor Saidov bugun Sloveniyaning O‘zbekistondagi yangi elchisi etib tayinlangan Alenka Suhadolnikdan ishonch yorliqlarini qabul qildi.
Baxtiyor Saidovga ko‘ra, Alenka Suhadolnikning mazkur lavozimga tayinlanishi O‘zbekiston va Sloveniya o‘rtasidagi ko‘p qirrali ikki tomonlama munosabatlarni yanada rivojlantirish va kengaytirishga xizmat qilishi kutilmoqda. Mavjud hamkorlik aloqalari bugungi kunda izchil sur’atlar bilan rivojlanib bormoqda.
Tomonlar o‘rtasidagi hamkorlikni mustahkamlash borasida katta imkoniyatlar mavjud bo‘lib, 2025-yilgi ikki tomonlama kun tartibi boy va istiqbolli yo‘nalishlarni o‘z ichiga oladi. Xususan, savdo-iqtisodiy, sarmoyaviy, madaniy-gumanitar va boshqa sohalarda aloqalarni chuqurlashtirish ustuvor vazifalardan biri sifatida belgilanmoqda.
2024-yil iyul oyida Darya Bavdaj Kuret Sloveniyaning O‘zbekistondagi elchisi etib tayinlangan edi. Alenka Suhadolnik 2024-2025-yillarda Sloveniyaning Toshkentdagi diplomatik missiyasini boshqargan Darya Bavdaj Kuret o'rniga tayinlandi.
2025-yil 31-yanvarda Baxtiyor Ibragimov O‘zbekistonning Albaniyadagi birinchi elchisi etib tayinlangani haqida xabar berilgan edi. Ravshan Usmonov esa O‘zbekistonning Islandiyadagi (qarorgohi London shahrida joylashgan) elchisi etib tayinlandi va 7-fevral kuni Islandiya prezidenti Xalla Tomasdottirga ishonch yorliqlarini topshirdi. 11-fevral kuni O‘zbekiston elchisi Temur Rahmonov Litva prezidenti Gitanas Nausedaga ishonch yorliqlarini topshirdi.
Izoh (0)