Abat Fayzullayev O‘zbekistonning San Marinodagi birinchi elchisi etib tayinlandi. Bu haqda “Dunyo” axborot agentligi xabar qildi.
Elchi ushbu davlat rahbarlari — Kapitan-regentlar Francheska Chiverkya va Dalibor Rikkardiga ishonch yorliqlarini topshirdi. Tantanali marosimda San Marino tashqi ishlar vaziri Luka Bekkari so‘zga chiqib, O‘zbekiston va San Marino o‘rtasidagi aloqalarni rivojlantirishga qaratilgan sa’y-harakatlarni, jumladan, ushbu mamlakatga birinchi elchining tayinlanishini yuqori baholadi.
O‘zaro savdo-iqtisodiy hamkorlikni rivojlantirish, ikki tomonlama shartnoma-huquqiy bazani mustahkamlash, ko‘p tomonlama hamkorlik yo‘nalishida, xususan, BMT va YXHT doirasida nomzodlar va tashabbuslarni o‘zaro qo‘llab-quvvatlash kabi mavjud manfaatli sheriklikni davom ettirishga ishonch bildirildi.
San Marino dunyodagi eng kichik davlatlardan biri hisoblanadi. Mamlakat Janubiy Yevropada joylashgan va to‘rt tomondan ham Italiya bilan chegaradosh. O‘zbekiston va San Marino o‘rtasidagi diplomatik munosabatlar 2021-yil 3-fevralda o‘rnatilgan.
Abat Fayzullayev 2023-yil noyabr oyidan buyon O‘zbekistonning Italiyadagi elchisi va Rimdagi xalqaro tashkilotlar (FAO, QXRXJ, BOOD) huzuridagi doimiy vakili hamda 2024-yil dekabr oyidan boshlab O‘zbekistonning Kiprdagi elchisi sifatida faoliyat yuritib kelmoqda. 2025-yilning mart oyida u O‘zbekistonning Maltadagi birinchi elchisi etib ham tayinlandi.
Abat Fayzullayev 2020—2023-yillarda O‘zbekistonning Avstriyadagi va o‘rindoshlik asosida Vengriyadagi elchisi sifatida ishlagan. U bir vaqtning o‘zida O‘zbekistonning Yevropada xavfsizlik va hamkorlik tashkiloti hamda Venadagi boshqa xalqaro tashkilotlar huzuridagi doimiy vakili lavozimida faoliyat olib borgan.
Izoh (0)