O‘zbekiston tashqi ishlar vaziri Baxtiyor Saidov 26-yanvar kuni Niderlandiyaning O‘zbekistondagi elchisi etib tayinlangan Niko Sxemersni qabul qildi. Bu haqda vazir o‘zining Telegram’dagi kanaliga yozib qoldirdi.
Qayd etilishicha, elchi TIV rahbariga ishonch yorliqlari nusxalarini topshirgan.
“Shubhasiz, barcha sohalarda, ayniqsa, iqtisodiy yo‘nalishda ikki tomonlama hamkorlik kun tartibini kengaytirish uchun ulkan imkoniyatlar mavjud. Biz janob elchining O‘zbekiston—Niderlandiya munosabatlarini boyitishga qaratilgan saʼy-harakatlarini qo‘llab-quvvatlashga tayyormiz”, — deb yozadi Baxtiyor Saidov.
Eslatib o‘tamiz, 2023-yil martda Baxtiyor Saidov Niderlandiyaning favqulodda va muxtor elchisi (qarorgohi Ostona shahrida) etib tayinlangan Andre Karstensning ishonch yorliqlarini qabul qilgandi. Undan oldin esa Xilles Arno Besxoor Plux Niderlandiyaning mamlakatdagi elchisi lavozimida faoliyat yuritgan.
Izoh (0)