Abat Fayzullayev O‘zbekistonning Maltadagi birinchi elchisi etib tayinlandi. Bu haqda “Dunyo” axborot agentligi xabar berdi.
2-mart kuni e’lon qilingan xabarda qayd etilishicha, elchi mamlakat prezidenti Miriam Spiteri Debonoga ishonch yorliqlari nusxalarini topshirdi. Tadbir davomida tashkil etilgan uchrashuv davomida Malta rahbari ikki davlatning geografik uzoqligiga qaramay, ko‘p qirrali hamkorlikni rivojlantirishga xizmat qiluvchi o‘zaro bog‘liq manfaat va maqsadlar borligini qayd etib o‘tgan.
Ikki davlatning xalqaro tashkilotlar, jumladan, BMT va Yevropa xavfsizlik va hamkorlik tashkiloti doirasidagi nomzodlari va tashabbuslarini o‘zaro qo‘llab-quvvatlash masalalariga alohida e’tibor qaratildi. Ikki davlat tashqi ishlar vazirlari 2024-yil sentyabr oyida Nyu Yorkda BMT Bosh assambleyasi yig‘ilishidagi ishtiroki doirasida ilk bor uchrashuv o‘tkazgan edi. 2025-yilning yanvarida Karmelo Inguanez Maltaning O‘zbekistondagi birinchi elchisi etib tayinlangandi.
Abat Fayzullayev 2023-yil oktyabridan buyon O‘zbekistoning Italiyadagi elchisidir. 2024-yil dekabrida u O‘zbekistonning Kiprdagi birinchi elchisi etib tayinlangandi. U Rimdagi xalqaro tashkilotlar (FAO, QXRXJ, BOOD) huzuridagi doimiy vakil ham hisoblanadi.
Abat Fayzullayev 2020—2023-yillarda O‘zbekistonning Avstriyadagi va o‘rindoshlik asosida Vengriyadagi elchisi sifatida ishlagan. U bir vaqtning o‘zida O'zbekistonning Yevropada xavfsizlik va hamkorlik tashkiloti hamda Venadagi boshqa xalqaro tashkilotlar huzuridagi doimiy vakili lavozimida faoliyat olib borgan.
Izoh (0)