Fariddin Nasriyev O‘zbekistonning Erondagi favqulodda va muxtor elchisi etib tayinlandi, deb xabar beradi “Dunyo” agentligi.
Tayinlovga qadar u 2018—2023-yillar davomida O‘zbekistonning Qozondagi Bosh konsulligiga rahbarlik qilgan. 42 yoshli Fariddin Nasriyev Toshkent moliya instituti va Toshkent davlat yuridik universitetini tamomlagan.
Mehnat faoliyatini 1999-yilda bank tizimida boshlagan va 2003-yildan buyon Tashqi ishlar vazirligining turli tuzilmalarida, jumladan, Belgiya va NATOdagi vakolatxonalarida faoliyat yuritgan. Tashqi ishlar vazirligining Konsullik-huquqiy departamentida u 3-kotiblikdan direktor o‘rinbosarigacha bo‘lgan pog‘onani bosib o‘tgan.
Ingliz, fransuz, rus va fors tillarida gaplasha oladigan Fariddin Nasriyev 2015—2023-yillar davomida Tehrondagi elchi lavozimida ishlab kelgan Bahodir Abdullayevning o‘rnini egalladi.
Oktyabr oxirlarida O‘zbekiston tashqi ishlar vaziri Baxtiyor Saidov Eronning O‘zbekistondagi yangi tayinlangan elchisi Muhammad Ali Iskandariyning ishonch yorliqlari nusxalarini qabul qilgani to‘g‘risida xabar berilgandi.
Izoh (0)