O‘zbekistonning Vengriyadagi elchisi lavozimida ishlab kelayotgan Oybek Shaxavdinov bir vaqtning o‘zida O‘zbekistonning Xorvatiyadagi elchisi bo‘ldi. Bu haqda Vengriyadagi O‘zbekiston elchixonasi xabar berdi.
23-oktyabr kuni u Zagrebda Xorvatiya Tashqi va Yevropa ishlari vazirligi protokol departamenti boshlig‘i Mirta Yelens Jupanga ishonch yorliqlari nusxalarini topshirdi. Suhbat davomida ikki mamlakat o‘rtasidagi hamkorlikning kelajagi muhokama qilindi.
Oybek Shaxavdinov 2024-yilning mart oyidan buyon qarorgohi Budapeshtda joylashgan Vengriyadagi birinchi elchi lavozimida ishlab kelayotgandi. U Xorvatiyada ham O‘zbekistonning birinchi elchisi bo‘ldi (qarorgohi Budapeshtda).
Oybek Shaxavdinov Birmingem universiteti (Buyuk Britaniya), Toshkent davlat yuridik universiteti (magistratura), Moskva davlat xalqaro munosabatlar institutining (MDXMI) tarjimonlar tayyorlash kursini tamomlagan.
Diplomat 2004-yildan buyon TIV tizimida. Mehnat faoliyatini Toshkentdagi Jahon iqtisodiyoti va diplomatiya universitetida boshlagan, so‘ngra TIVning Yevropa davlatlari bilan hamkorlik boshqarmasida referentlikdan boshqarma boshlig‘i singari diplomatik xizmatning barcha bosqichlarini bosib o‘tgan. O‘zbekistonning Bryusseldagi elchixonasida ishlagan.
Izoh (0)