Polsha bosh vaziri Donald Tuskka nisbatan Turkiya prezidenti Rajab Toyyip Erdo‘g‘onning qonunga muvofiq ro‘yxatdan o‘tkazilmagan sovg‘asi uchun jinoiy ish qo‘zg‘atilishi mumkin. Bu haqda Rzeczpospolita gazetasi xabar bermoqda.
Mart oyida Tusk ijtimoiy tarmoqda Turkiya prezidentining sovg‘asini xalqlar o‘rtasidagi tinchlik va do‘stlik ramzi sifatida ta’riflab, uning suratini suratini o‘zining X ijtimoiy tarmog‘idagi sahifasida e’lon qilgan. Bu 1745-yilda Polsha kansleri Anjey Stanislav Zaluskiy tomonidan Usmonli imperiyasining bosh vaziri Sayyid Hasan poshoga Polshadan yuborilgan maktub edi.
Nashrning eslatishicha, Polsha qonunchiligiga ko‘ra, minimal ish haqining yarmidan (taxminan 197 dollar) ortiq miqdordagi sovg‘a olgan amaldor uni olgan kundan boshlab 30 kun ichida ro‘yxatdan o‘tkazishi shart. Tusk olgan noyob buyumning qiymati bu miqdorning yarmidan ancha ko‘p. Shunday bo‘lsada, sovg‘a ro‘yxatdan o‘tkazilmagan.
Maqolaga javoban Polsha hukumati axborot markazi bosh vazir tomonidan olingan hujjat “Tuskning shaxsan o‘zi uchun emas, balki Polsha xalqi uchun sovg‘a” ekanini va u Muzeylar kechasida Vazirlar Kengashi raisi idorasida ko‘rish uchun namoyish etilishini ma’lum qildi.
“Hozirda xat bosh vazir devonxonasida saqlanmoqda va 17-may kuni bo‘lib o‘tadigan Muzeylar kechasida tashrif buyuruvchilar uchun namoyish etiladi. Bosh vazir tomonidan Polsha davlati nomidan va uning manfaati yo‘lida olingan sovg‘alar devonxona fondlarida qoladi yoki muzeylar yoxud boshqa davlat muassasalariga topshiriladi hamda Polsha Respublikasi bosh vaziri uchun to‘g‘ridan-to‘g‘ri foyda keltirmaydi”, deya gazetaga ma’lum qildi hukumat axborot markazi.
Polsha bosh vaziri qonunchilikka ko‘ra, e’tiborsizligi tufayli uch yilgacha ozodlikdan mahrum qilinishi mumkin.
Izoh (0)