Serbiya prezidenti Aleksandr Vuchich va Slovakiya bosh vaziri Robert Fitso 9-may kuni Moskvada bo‘lib o‘tadigan G‘alaba paradida ishtirok etishi rejalashtirilgan. Shu munosabat bilan Polsha, Litva va Latviya ushbu siyosatchilar bo‘lgan samolyotlarning o‘z havo hududi orqali uchishiga ruxsat bermadi.
Serbiyaning “Novosti” portali xabariga ko‘ra, 6-may kuni Litva va Latviya hukumatlari Vuchich bo‘lishi kerak bo‘lgan samolyotning Rossiyaga uchib o‘tishiga to‘sqinlik qilgan. Riga bu qarorni “parvoz maqsadining siyosiy nozikligi” bilan izohlasa, Vilnyus buni “texnik va diplomatik sabablarga” tayanib amalga oshirgan.
3-may kuni Vuchich sog‘lig‘i yomonlashgani sabab AQSHdagi rasmiy tashrifini bekor qilgandi va Belgraddagi harbiy tibbiyot akademiyasiga yotqizilgan edi. Serbiya moliya vaziri Sinisha Malining aytishicha, prezidentning Moskvaga borishi ehtimoldan holi emas, biroq bu boradagi qaror hali yakuniy emas.
Shuningdek, Polsha va Litva Slovakiya bosh vaziri Fitso samolyotining ham Rossiyaga parvoziga cheklov qo‘ygan. Biroq Slovakiyaning “Pravda” nashri Fitso maxsus reys bilan Moskvaga borishi uchun kerakli hujjatlar tayyorlangach, Polsha parvozga ruxsat berganini bildirgan. Shunga qaramay, Polsha hukumati Fitsoning harbiy paradda ishtirok etishiga salbiy munosabatda ekanini ma’lum qilgan.
Rossiya prezidenti yordamchisi Yuriy Ushakovning aytishicha, Vladimir Putin 9-may kuni Moskvada Vuchich va Fitso bilan uchrashishni rejalashtirgan. U Slovakiya bosh vaziri bilan Ukrainadagi urushni, Serbiya prezidenti bilan esa G‘arbiy Bolqondagi vaziyatni muhokama qiladi.
Izoh (0)