Yevrokomissiya Polshada qonun ustuvorligini jiddiy buzish xavfi endi yo‘qligini aytdi, deya Deutsche Welle xabar berdi.
Ma’lum bo‘lishicha, Yevrokomissiya Polshaga nisbatan olti yildan ko‘proq vaqt davomida ko‘rilgan mamlakatdagi adliya islohoti bo‘yicha mojaro tufayli boshlangan sud jarayonini tugatadi. Yevrokomissiya rahbari Ursula fon der Leyen X’da Polsha uchun yangi bobning boshlanishi haqida yozgan. U mamlakat bosh vaziri Donald Tusk va uning hukumatini “ushbu muhim yutuq” bilan tabriklagan.
Bu Polshaning mashaqqatli mehnati va islohot yo‘lidagi qatʼiy saʼy-harakatlari natijasidir, — deya qo‘shimcha qilgan.
Yevrokomissiyaning ushbu taklifi 21-may kuni Lyuksemburgda bo‘lib o‘tadigan yig‘ilishda Yevropa Ittifoqiga aʼzo davlatlarning Yevropa ishlari bo‘yicha vazirlari tomonidan muhokama qilinadi.
Bryussel va Polshaning avvalgi milliy konservativ hukumati o‘rtasida sud-huquq islohotlari bo‘yicha mojaro 2016-yil boshidan beri davom etmoqda. Polsha prezidenti Anjey Duda umumiy yurisdiksiya sudlari to‘g‘risidagi qonunni imzolaganidan so‘ng, 2017-yilda Yevrokomissiya Yevropa Ittifoqi tarixida birinchi marta shartnomaning 7-moddasiga asoslanib, uning YI standartlariga muvofiqligini tekshirish tartibini boshlagan edi.
Mojaro paytida Yevropa Ittifoqi Polsha uchun mo‘ljallangan ko‘p milliard dollarlik to‘lovlarni muzlatib qo‘ygan. Jarayonning bir qismi sifatida Varshavaga Yevropa Ittifoqi Kengashidagi ovoz berish huquqidan mahrum qilish bilan tahdid qilingan. 2023-yil oktyabr oyida Tuskning partiyasi saylovlarda g‘alaba qozonganidan so‘ng, yangi hukumat tuzilgan, u Polsha adliya tizimida yangi islohotni boshlagan va Bryussel talablarini bajargan.
Polshaning yangi adliya vaziri Adam Bodnar tegishli chora-tadbirlar rejasini taqdim etganidan so‘ng, Yevrokomissiya Polsha uchun mojaro paytida muzlatib qo‘yilgan 137 milliard yevro miqdoridagi mablag‘ni blokdan chiqargan.
Polshadagi munozarali sud-huquq islohoti adliya vazirining sud raislarini ishdan bo‘shatish va ularni boshqa nomzodlar bilan almashtirish huquqini taqdim etgan.
Izoh (0)