Polsha hukumati qunduzlarning yashash joylarini nazorat qilish va ulardan to‘g‘onlarga zarar yetkazmaslik imkonini beradigan bir nechta qonuniy yechimlarni ko‘rib chiqadi. Bu haqda mamlakat bosh vaziri Donald Tusk inqirozga qarshi shtab yig‘ilishida ma’lum qildi.
“Siz to‘g‘onlarda qunduzlarning mavjudligini tez o‘zgartirishni talab qilayotgan birinchi odam emassiz. 2010-yilda biz bunday qarorlar qabul qilganmiz, u ekologlarni g‘azablantirgan, lekin ustuvorliklar ham bo‘lgan. Ba’zan jonivorlarni sevish yoki shaharlar, qishloqlar xavfsizligi va to‘g‘onlarning barqarorligi o‘rtasida tanlov qilishga to‘g‘ri keladi”, dedi Tusk.
U amaldagi qonunlar doirasida qo‘ldan kelgan barcha ishni qilish kerakligini ta’kidlab, zarurat tug‘ilganda yangi huquqiy hujjatlarni qabul qilishga va’da berdi.
Polshalik mutaxassislarning fikricha, qunduzlardan to‘g‘onlarga zarar yetkazish muammosini bunday inshootlarni daryolardan uzoqroqda qurish yoki ularni metall to‘r bilan qoplash orqali hal qilish mumkin.
Polshaning janubi, janubi-g‘arbi va g‘arbidagi Sileziya, Quyi Sileziya, Opolskiy, Lyubush va Kichik Polsha hududlarida kuchli yomg‘irdan so‘ng daryolar sathining keskin ko‘tarilishi tufayli keng ko‘lamli suv toshqinlari sodir bo‘ldi. Suv toshqinlari 1997-yildan beri kuzatilganlari orasida eng kuchlisi deb baholanmoqda.
Politsiya ma’lumotlariga ko‘ra, toshqinlar oqibatida yetti kishi halok bo‘lgan. 26 ming nafar harbiy xizmatchi qutqaruvchi va o‘t o‘chiruvchilarga ko‘maklashmoqda. To‘rtta hududda to‘rt yuzga yaqin maktab yopilgan. Sileziya, Quyi Sileziya va Opolskiy hududlaridagi 28 ta tumanda tabiiy ofat rejimi e’lon qilingan.
Izoh (0)